Kryetari i Partisë Demokratike, Lulzim Basha, ka paraqitur fakte dhe të dhëna mbi rolin e organizatave kriminale, që sipas kreut të partisë më të madhe opozitare, kanë blerë votat në zgjedhjet e 25 Qershorit, në bashkëpunim me Qeverinë.
Denoncimet Basha i ka bërë gjatë një darke pune me kongresmenët Devin Nunes, Kryetar i Komisionit për Inteligjencën në Kongresin amerikan, dhe Rick Craëford, anëtar i këtij komisioni.
Në qendër të bisedës së kreut të PD dhe kongresmenëve amerikanë ishin çështjet mbi situatën në Shqipëri dhe Rajon, bashkëpunimi strategjik me SHBA për t’u përballur me kërcënimet e krimit të organizuar, trafikut të drogës dhe korrupsionit.
Bashkëbiseduesit ndanë shqetësimin për shumë prej problemeve të evidentuara në zgjedhje dhe u shprehen në mbështetje të një reforme të thellë zgjedhore dhe zbatimit të reformës në drejtësi.
Po ashtu, bëhet e ditur se ata shprehën shqetësimin për rritjen galopante të kultivimit e trafikimit të drogës në Shqipëri.
Basha i siguroi kongresmenët për qendrimin e palëkundur të PD, në luftën kundër korrupsionit, krimit të organizuar dhe drogës, në shërbim të demokracisë, sundimit të ligjit dhe të ardhmes europiane të Shqipërisë dhe mbarë rajonit. /tesheshi.com/
