Një ditë pas takimit kokë më kokë që kryeministri i Kosovës, Isa Mustafa zhvilloi me homologen e tij serbe, Ana Bërnabiç, zbardhen detaje nga biseda e shkurtër.
Sokol Havolli, shef i kabinetit të kryeministrit Mustafa, ka treguar se çfarë u diskutua në atë takim.
“Sa kam marrë vesh nga kryeministri, është biseduar për temat e bashkëpunimit rajonal, për implementimin e marrëveshjeve të Triestes dhe çështjet e mbetura të Traktatit të Komunitetit të Transportit.
Komunikimi me të gjithë kryeministrat ka qenë i qetë dhe pozitiv”, ka thënë Havolli.
Mustafa ka takuar edhe homologët e tjerë të vendeve të Ballkanit Perëndimor në kuadër të takimit joformal të kryeministrave, që u mbajt dje në Durrës.
Bërnabiç, e cila zëvendësoi Aleksandar Vuçiç në krye të ekzekutivit, ka shprehur gatishmërinë për vazhdimin e dialogut për normalizimin e marrëdhënieve me Kosovën. /tesheshi.com/
