Kryesia e PD, e mbledhur për të analizuar zgjedhjet e 25 qershorit dhe ndryshimet në statut, është shoqëruar me debate të forta, deri në tentativë goditjesh mes anëtarëve të forumit më të lartë drejtues të partisë më të madhe në opozitë.
Debatet kanë nisur mes Jemin Gjanës dhe Valbona Mezinit, për të vijuar më tej me kritika dhe akuza.
Megjithëse ka një tentativë për të ulur tensionet mes grupimeve kundërshtare në PD, duket se është tejet e vështirë arritja e një kompromisi. Basha ka kërkuar në mbledhje që të gjithë të kontribuojnë për PD, por duket se te kundërshtarët e tij në parti nuk kanë besim në ftesat apo deklaratat e tij.
Debatet
Basha: Të ndërtojmë përgjigjen për skemën dhe infrastrukturën e blerjes së votës dhe shantazhimit. Ta identifikojmë infrastrukturën e tyre emër për emër, kudo në çdo zonë
Malltezi: Duhej të ngrinim zërin dhe denonconim vjedhjen e votës. Demokratet janë të demotivuar. Nuk dokumentuam asgjë”, ka thënë Malltezi.
Imami: Analizën ta ka bërë Berisha. Mjafton ti ta kuptosh pse nuk kishim nevoje për bashkim para 6 muajsh po kemi sot? Se ti vendose kështu. Unë jam i hapur për bashkim, por duhet të japësh prova pse të besojmë. Dhe e dyta duhet të kthehemi te diskutimet ideologjike dhe programore të PD. Të hartojmë një dokument strategjik për një plan pune që duhet të ndjekim dhe të jemi prezentë me njerëzit. Unë kam punuar me të gjithë deputetet dhe e di sa kapacitete e potencial kemi dhe duhet ta shfrytëzojmë.
Jorida Tabaku: Nuk është aspak mire që kolege në Kryesi shajnë drejtues aktuale dhe të lidershipit të kaluar. Përsa i përket analizës, duhen dërguar njerëz me eksperiencë dhe jo arrogantë. Të fillojme të punojmë, të dalim në terren. Më vjen mirë që Kryesia u mblodh dhe ta përdorim si forum për diskutime se nuk më vjen mirë që dëgjoj e lexoj sulme ndaj anëtarëve aktualë dhe të kaluar të lidershipit. Çdo gjë perceptohet nga anëtaret e kjo frymë sigurisht nuk ndihmon askënd.
Basha: Ata që flasin pa fakte dhe prova nuk i shërbejnë PD, çojnë ujë në mullirin e Edi Ramës.
