Zbardhen debatet e ashpra në Konferencën e Kryetarëve të Kuvendit, ku Gramoz Ruçi u ka kujtuar deputetëve të LSI-së fatin e Vetëvendosjes në Kosovë.
Ruçi ka kujtuar fatin e katër deputetëve të ‘Vetëvendosjes’, të arrestuar dhe dënuar për hedhjen e gazit lotsjellës në Kuvendin e Kosovës.
Bëhet fjalë për mbledhjen e 11 janarit ku Ruçi ka deklaruar se Garda e Republikës, gjatë seancës së zgjedhjet së Arta Markut-Kryeprokurore të përkohshme, nuk e ka penguar Sali Berishën të flasë, as me urdhrin e tij dhe as me të Edi Ramës.
Ndërkaq, përfaqësuesit e opozitës, kryetari i grupit parlamentar Edmond Spaho dhe deputetët Edi Paloka dhe Fatmir Mediu, kanë kërkuar disiplinimin e Gardës së Republikës që të mos ndërhyjë në zhvillimet gjatë seancave plenare.
Paloka ka akuzuar edhe Policinë, e cila sipas tij është përpjekur që të ndalojë deputetët e opozitës jashtë sallës së Kuvendit.
Deputeti Genc Pollo ka kërkuar që të mbahet përgjegjësi për ndalimin e ish-kryeministrit Sali Berisha nga ana e Gardës.
Gjatë diskutimeve, opozita ka kërkuar dorëheqjen e Kryetarit Gramoz Ruçi, ndërsa ky i fundit i ka ftuar që të bëjnë një mocion mosbesimi.
Sipas procesverbalit të botuar, Edmond Spaho, kryetari i grupit të PD-së ka deklaruar se “më datën 18 dhjetor është kryer një shkelje e rëndë e Kushtetutës, një puç kushtetues me urdhër të Edi Ramës, por edhe me dijeninë, miratimin dhe zbatimin nga ana juaj”.
Taulant Balla, kryetari i grupit socialist, tha se “Kushtetuta ka përcaktuar qartë rastet dhe mënyrat se si adresohet rasti i supozuar i një shkeljeje kushtetuese.
Kemi dëgjuar në vitin e kaluar që do të kishte kërkesë në Gjykatë Kushtetuese apo nisma të tjera. Çdo grup parlamentar, 28 deputetë janë legjitimuar pranë Gjykatës Kushtetuese për të bërë hapat kushtetues për çdo vendim që ata mendojnë që është antikushtetues”.
Deputeti i opozitës, Fatmir Mediu ka kërkuar që të ndëshkohet ai që ka dhënë urdhër që Garda e Republikës të ndërhyjë me trupa ndaj deputetëve, pasi sipas tij akti është jo-kushtetues.
Kurse nënkryetari i Kuvendit, Edi Paloka, tha se po përdoret parlamenti për të mbrojtur krimin.
“Ju që bërtisnit deri dje vettingu, vettingu sa i bëtë qytetarët shqiptarë tu dilte Vetingu në ëndërr, sot keni vendosur një prokuror që, jo vetëm nuk ka bërë vetingun, por është vënë aty me të vetmin qëllim që të mbrojë të korruptuarit dhe të inkriminuarit që janë radhët e qeverisë tuaj dhe në parlamentin tuaj. Prandaj nuk mund të merret kaq lehtë kjo çështje”.
Genc Pollo kërkoi të merren masa ndaj atyre që penguan Sali Berishën që të ngjitet në podiumin e Kuvendit.
Kryeparlamentari Gramoz Ruçi ka mohuar akuzuar e opozitës dhe ka theksuar se gjatë zgjedhjes së Kryeprokurores Arta Marku është goditur rëndë parlamentarizmi.
“Kur them që u godit parlamentarizmi dhe imazhi i Shqipërisë, këtë nuk e bëri Garda, pasi parlamenti nuk është i Gardës dhe gardistëve. Nëse bëjmë gabim njerëzor, të cilin unë që në atë moment brenda 5 minutave e kam korrigjuar direkt live në sallë dhe menjëherë padrejtësia, nëse do ta quajmë kështu, ndaj deputetit Berisha u vu në vend, duke u larguar garda dhe ai vazhdoi fjalën. Por nuk ishte Garda që goditi parlamentarizmin dhe që prishi imazhin e Shqipërisë atë ditë. Ishte sjellja e pa precedent e deputetëve të caktuar të opozitës, të cilat nuk duhet të ndodhin më në parlamentin shqiptar”, tha Ruçi.
Ruçi më pas ka kujtuar rastin e deputetëve të Vetëvendosjes që janë ndaluar nga policia dhe dënuar nga gjykata pasi hodhën bomba tymuese në Kuvend.
“Le të marrim shembullin e vëllezërve kosovarë që hodhën mjete të ndaluara. Ata u ndaluan dhe u dënuan për aktet e tyre”, tha Ruçi, i cili refuzoi të japë dorëheqjen dhe ka ftuar opozitën të bëjë mocion. /tesheshi.com/
