Nga Ylli Pata
Tek Liqeni artificial sot nuk kishe ku të hidhje dardhën!
Pa frikë, më shumë se 2 mijë të rritur dhe nja 500 kalamaj kishin zaptuar parkun e lojërave që prej disa muajsh është kthyer në vorbullën e polemikave mes mazhorancës dhe politikës.
Njësoj si në 100 vjetorin e Pavarësisë me tortën, por kësaj radhe nuk kishte pana me ton për ti futur në legenë e kusi.
Kalamajtë u sulën nëpër lojërat e reja për të shikuar ditën e vrenjtur, por gjithsesi me një zagushi që të zinte frymën.
Mamatë ishin të stresuara në kulm pasi kalamajtë iu ikën nga sytë prej zallamahisë gjigante.
“Pse ke ardhur sot?”, pyes një xhaxho me kapele republike që bashkë me dy shokë të tij po shpotisin rëndë në distancë Presidentin Bujar Nishani.
“Kemi ardhur të prezantojmë veprën që ka ngritur kryetari i bashkisë sonë, që është djalo që punon e jo llafe”, thotë xha Petraqi.
Ndërkaq, një aktivist i shoqërisë ka vënë një pankartë ku shkruan se të drejtat e fëmijëve shkelen përditë.
Erion Veliaj vjen më vonë me bashkëshorten të veshur me bluza që mbajnë personazhe filmash vizatimorë.
I rrethuar nga një numër i madh qytetarë kuriozë dhe më pak fëmijë, Veliaj flet si triumfator.
“Inatet e të rriturve nuk duhet të pengojnë zhvillimin e Tiranës dhe progresin e fëmijëve. Nuk duhet të pengojnë projektin që kemi për Tiranën. Sot ky debat u mbyll dhe është referendumi më i mirë. Garantoj se puna në Tiranë do të vazhdojë. Shumë shpejt hapim parkun e lodrave tek “Mine Peza” . Nuk është prerë asnjë pemë dhe nuk ka asnjë kafe. Është shumë e rëndësishme të mos bëjnë histeri. Sherret e politikës t’i lëmë në parlament, qytetin ta bëjmë të bashkuar. Nuk është moment për hakmarrje as për arrogancë”, – tha Veliaj.
Gazetarja Irena Luto, e cila banon pranë liqenit, ka sjellë djalin të luajë në parkun e ri dhe kur e pyes si iduket, thekson se është një kënd me standarde. “Edhe në Londër ku jetoj, pjesën më të madhe, parqet për fëmijë këtë trajtë kanë dhe synojnë të japim më shumë liri dhe lojëra aktive dhe jo vetëm lisharëse dhe rrëshqitëse që nuk janë të shëndetshme”, thotë ajo.
Veliaj largohet dhe bashkë me të edhe kamerat. Fëmijët duket sikur marrin frymë lirisht, por mamatë e tyre sërish janë të çakërdisura. Po u merret fryma.
Xhaxhot që kanë zënë parkun që në mëngjes, nuk po largohen.
“Po pse nuk shkoni tek stolat tuaj aman se po na merret fryma”, ia beh një nënë e re.
Por i moshuari ia kthen menjëherë: “festa mbaroi, dhe liqeni nuk është juaji po joni”!
Po kush janë “ju dhe ne”?
Ndoshta zagushia ia ka marrë frymën nga pak të gjithëve…./tesheshi.com/
