Nga Musa Mustafa
Policia e Kosovës nw veri tw Mitrovicws, pra ajo serbe, ka arrestuar gjatë orëve të pasdites Hazir Feratin, banor i lagjes Kroi i Vitakut në Veri, mu për shkakun përse po tentonte të rindërtojë shtëpinë e tij të cilën ja kanë djegur serbët gjatë luftës.
“Policia e Kosovës nga stacioni në veri të Mitrovicës, sot më arrestoi dhe m’i ndërpreu punimet në rindërtimin e shtëpisë”, ka thënë Hazir Ferati për portalin tesheshi.com, pasi ka dalë nga stacioni i policisë në veri të Mitrovicës.
Por Ferati ka thënë se më shumë se arrestim, shoqërimi i tij për në polici ka qenë kindapim (pengmarrje), pasi sipas tij, ai ka qenë në tokën e tij duke punuar (duke u marrë me themelet e shtëpisë), ndërsa ata që e kanë shoqëruar, nuk i kanë treguar asnjë dokument që më e urdhëronte të shkojë në stacion.
“Policia e Kosovës nga stacioni i Veriut, më detyrori që të shkojë me ta dhe atje më intervistuan me motivacion për prishje të rendit dhe qetësisë publike” ka thënë Ferati.
Ferati ka bërë të ditur se punët për rindërtimin e shtëpisë, të cilën gjatë luftës ia kanë djegur dhe rrafshuar ekstremistët serbë, i ka filluar të hënën dhe, që nga ajo ditë inspektorët serbë dhe policia për çdo ditë i kanë kërkuar që t’i ndërpresë punimet.
Sipas tij, si inspektorët, ashtu edhe policia, i kanë thënë se kanë urdhër nga kryetari i komunës së Veriut të Mitrovicës Goran Rakiq, për ndërprerjen e punimeve.
“Kjo që po ndodhë me mua vërtetë është e pakuptimtë dhe jonjerëzore. Krejt kjo po bëhet për shkak të kërkesës së strukturave paralele serbe dhe të ekstremistëve serbë, që të mos na lejohet neve shqiptarëve të kthehemi në trojet tona. Në vend që të kërkohen dhe të vendosen para drejtësisë ata që na i kanë djegur shtëpitë, neve nuk na lejohet ndërtimi i shtëpive. Kjo nuk ndodhë askund në botën demokratike, e madje as në vendet totalitare”, ka thënë Ferati.
Ai kërkon nga institucionet dhe organet shtetërore të Kosovës dhe sidomos nga Policia e Kosovës, që t’i lejohet ndërtimi i shtëpisë me mjete nga fondi “Ndihmo edhe Ti”, në mënyrë që të mos vuajë më duke jetuar tash e 16 vite nëpër bodrume me qira në jug të Mitrovicës.
“Policia më liroi vetëm pasi biseduan me telefon me një pokurore e cile kërkoi lirimin tim të menjëhershëm. Policia nuk lëshoi asnjë dokument për ndalimin tim, por vetëm ka shtuar për mua se punimet në rindertimin e shtëpsë nuk do t`i ndalojë.
Në anën tjetër, përfaqësuesi i lagjes Kroi i Vitakut, Nazmi Ismaili, ka theksuar se policia e Kosovës në veri të Mitrovicës është duke punuar direkt me urdhëra të strukturave paralele të Serbisë duke mos lejuar banorët shqiptarë për të rindërtuar shtëpië e tyre e për t’u kthyer në Veri.
“Policia dhe institucionet të tjera të komunës së Veriut të Mitrovicës janë duke bërë segregacion dhe diskriminim të hapët ndajë popullatës shqiptare, sepse kjo polici dhe këto institucione, asnjëherë nuk kanë penguar ndërtimin e blloqeve të banimit të serbëve në lagjet shqiptare, edhe pse kurrë më parë nuk kanë ekzistuar” ka thënë Ismaili.
Ky i fundit ka paralajmëruar agravim të situatës nëse qeveria e Kosovës nuk ndërhyn me autoritetin e vet për ta zgjidhur këtë çështje.
Durimit të banorëve shqiptarë të lagjes Kroi i Vitakut po i vie fundi, andaj pasojat për eskalim të situatës do t’i bartin Policia e Kosovës në Veri si dhe institucionet qendrore të Kosovës”, ka thënë Nazmi Ismaili. /tesheshi.com/
