Nga Blendi Gashi
Përfaqësuesit e Listës Serbe të cilët u kthyen së fundmi në Kuvend pas një bojkoti disa mujor kanë deklaruar se këtë e kanë bërë vetëm për t’i dhënë shtytje që sa më parë të krijohet Asociacioni i Komunave me shumicë serbe.
Përfaqësuesit e kësaj liste, dje zhvilluan një takim me kryeministrit serb, Aleksandër Vuçiç, pas mosmarrëveshjeve të fundit që ndodhën brenda këtij subjekti politik serb dhe debatuan edhe për “Zajednicën”.
Nga ky takim qeveria serbe doli me një ultimatum. Nëse brenda disa javëve nuk bëhen hapa konkretë për formimin e Asociacionit, përfaqësuesi i ashtuquajtyrës zyrë për Kosovën Marko Gjuriç, kërcënoi se këtë do ta bëjnë vetë serbët.
“Zajednica do të themelohet”
Por, qeveria “Mustafa”, nuk preferon të flas shumë për kërcënimet e Serbisë. Krejt çfarë thotë zv.ministri Bajram Gecaj, është se “Zajednica” do të themelohet.
“Qeveria e Kosovës e ka obligim ligjor themelimin e Asociacionit të Komunave me shumicë serbe. Gjithashtu edhe vendimi i Gjykatës Kushtetuese na obligon për të njëjtën gjë”, ka thënë Gecaj, për tesheshi.com.
I pyetur se a do t’i thërrasin në takim përfaqësuesit e “Srpska”-s, pas takimit që dje zhvilluan me Vuçiçin, zv.ministri Gecaj duke mos dhënë një përgjigje konkrete ka deklaruar se “ne në vazhdimësi bisedojmë me përfaqësues të Listës Serbe”.
Për kërcënimet e Vuçiçit, ka reaguar përmes një postimi në Facebook edhe zv.ministri i Punëve të Jashtme, Valon Murtezaj, i cili kërkon që qeveria dhe opozita të jenë unike përballë përpjekjeve të qeverisë serbe që të ndërhyjnë në punët e shtetit tonë.
“Përfaqësuesit e serbëve në Kosovë duhet ta kuptojnë që në Prishtinë kryhen punët. Beogradi as nuk do të pyetet dhe as dëgjohet asnjëherë, se kush dhe çfarë duhet të bëjë në Kosovë”, ka shkruar Murtezaj.
Ndërsa, opozita i quan të papranueshme kërcënimet e tilla, derisa shprehet se “Zajednica”, duhet të formohet vetëm sipas vendimit të Gjykatës Kushtetuese.
“Kërcënimet nga Serbia si pasojë e qeverisjes së dobët”
Kryetari i grupit parlamentar të AAK-së, Pal Lekaj, thotë se shteti ynë që nga shpallja e pavarësisë po jeton nën ultimatume nga serbët pa qenë në gjendje asnjëherë t’ua tregoj vendin.
“Duke pasur parasysh se kemi qeveri që është më e dobëta në historinë e pasluftës edhe mund të tentohet që Serbia të bëjnë diçka të tillë përmes disa serbëve në Kosovë.
Vendi për të shpëtuar nga këto marrëveshje të dëmshme duhet të shkojë në zgjedhje që të mos rrezikohemi edhe me tutje nga mosveprimi i Ekzekutivit, me komponentët e vet për të ruajtur sovranitetin e integritetin shtetëror të paprekur dhe të pacënuar nga gjithkush që i teket”, ka thënë Lekaj, për tesheshi.com.
“Duhet respektuar vendimi i Kushtetueses”
Valdete Bajrami, shefe e grupit parlamentar të NISMA-s, thotë se edhe Lista Serbe edhe qeveria e Serbisë duhet të kuptojnë se në Kosovë nuk janë ata që pyeten e aq më pak që vendosin se çka, kur dhe si të veprohet brenda shtetit tonë.
Sa i përket krijimit të Asociacionit, Bajrami pohon se “Srpska” dhe Beogradi, por edhe qeveria “Mustafa” duhet të respektojnë vendimin e Gjykatës Kushtetuese dhe ligjet e shtetit të Kosovës. “Ky Asociacion do të jetë i njejtë sikur Asociacioni i komunave të Kosovës dhe në asnjë mënyrë nuk guxon të jetë me kompetenca ekzekutive siç po tenton ta bëjë Serbia përmes Listës Serbe”, ka thënë Bajrami, për tesheshi.com.
Portali ynë ka tetnatuar të marrë një përgjigje edhe nga Lëvizja Vetëvendosje por ata nuk janë përgjigjur në pyetjet e dërguara me shkrim.
Ndryshe, Gjykata Kushtetese në muajin nëntor të 2015-ës ka konstatuar se parimet e përgjithshme të Asociacionit nuk janë tërësisht në përputhshmëri me frymën e Kushtetutës, përkatësisht me Nenin 3, i cili ka të bëjë me barazinë para ligjit, me Kapitullin II që ka të bëjë me të drejtat dhe liritë themelore, si dhe me Kapitullin III për të drejtat e komuniteteve dhe pjesetarëve të tyre. Këto parime, sipas Kushtetueses, duhet të jenë në pajtueshmëri me standardet kushtetuese të Kosovës. /tesheshi.com/
