Nga Blendi Gashi
Janë bërë afër një muaj e gjysmë kur Lista Serbe vendosi të largohet nga institucionet e Kosovës, kjo pas pakënaqësisë për miratimin e ligjit për “Trepçën”.
Pavarësisht deklarimeve të përfaqësuesve të kësaj liste se nuk do t’i kthehen punës në institucione, siç duket dalëngadalë kjo listë e dirigjuar plotësisht nga Beogradi po trason rrugën që të kthehet në institucione.
E siç duket gatishmëria e kësaj liste për tu rikthyer në institucione është drejtpërdrejt e lidhur me çështjen e themelimit të Asociacionit të Komunave me Shumicë Serbe apo siç njihet ndryshe edhe si “Zajednica”.
Drejtuesit e “Srpska-s”, zv. ministri Branimir Stojanoviq dhe ministrat Ljubomir Mariq dhe Dalibor Jevtiq kanë deklaruar se presin nga qeveria e Kosovës që fjalët t’i kthej në vepra dhe me shumë sinqeritet t’u bëjë thirrje që ata të kthehen në institucionet kryesore të Kosovës.
Në deklaratën e lëshuar nga Lista Serbe thuhet se “kërkojmë që të vihet dekret për themelimin e Komunave Serbe, në përputhje me marrëveshjen e arritur më parë”.
Por, përfaqësues të qeverisë së Kosovës thonë se kanë ftuar drejtuesit e Listës Serbe për bisedime dhe se presin prej tyre përgjigje, derisa nuk kanë një datë të saktë se kur eventualisht mund të themelohet e ashtuquajtura “Zajednica”, që themelimi i saj për opozitën është tërësisht i papranueshëm për çka janë organizuar muaj më parë edhe protesta.
Gecaj: Ftesa për ‘Srpska-n’ çdo herë serioze, nuk ja kemi vën ‘lakun në fyt’
Zv.ministri Bajram Gecaj, njëherit këshilltar i kryeministrit Isa Mustafa, thotë se ofertat e qeverisë në drejtim të Listës Serbe për të biseduar për kthim në institucione çdo herë kanë qenë serioze.
“Qeveria e ka ftuar Listën Serbe të bisedoj dhe ftesat janë gjithëherë serioze. Na është thënë se do të na njoftojnë kur të jenë gati dhe nuk ua kemi vendosur “lakun në fyt”, thotë Gecaj, për tesheshi.com.
Kurse, sa i përket çështjes së themelimit të Asociacionit, përfaqeësuesit e qeverisë nuk japin ndonjë date se kur mund të procedohet çështja në fjalë.
“Çështja e Asociacionit do të procedohet sapo të ketë klime pozitive për këtë çështje”, thotë Gecaj.
Opozita: S’e lelojmë themelimin e “Zajednicës”
Partitë opozitare në Kosovë thonë se gatishmëria e “Srpska-s”, për t’iu rikthyer institucioneve lidhet me faktin se kanë marrë garanci nga qeveria për themelimin e “Zajednicës”, por shprehen se nuk do të lejojnë një gjë të tillë.
Shkodran Hoti, zëdhënës i Lëvizes Vetëvendosje thotë se qeveria aktuale në vazhdimësi ka treguar një gatishmëri jashtëzakonisht të madhe për t’iu nënshtruar Listës Srpska, rrjedhimisht politikave shoviniste të Beogradit.
Hoti, thotë se një gjë e tillë është vërejtur që nga formimi i koalicionit qeverisës, dhe së fundi me favoret që ju bën sips tij Serbisëqë kjo e fundit të pranojë kodin telefonik për Kosovën.
“Me gjitha këto favore, tashmë formacioni Lista Srpska ka dhënë sinjale për kthim në Kuvend, duke pritur ‘ofertë serioze’, e që nënkupton garancinë për themelimin e ‘Zajednicës’. Por, përkundër këtyre pazareve të kësaj qeverie, të cilat tentojë t’i bëjë dhe s’janë diçka e re dhe e paritur nga ta, VV mbetet e vendosur që të mos e lejoj ‘Zajednicën’. Themelimi i saj paraqet rrezikun më serioz për copëtim apo bosnjëzim të Kosovës, lëvizja është e përkushtuar dhe angazhohet me gjitha forcat ta ruaj integritetin dhe sovranitetin e Kosovës”, thotë Hoti për tesheshi.com.
Avni Arifi, nga Aleanca për Ardhmërinë e Kosovës shprehet se qeveria “Mustafa”, duhet të përmirësoj shkeljet që i ka konstatuar Gjykata Kushteuese për Asociacionin e të mos ndërmarrë hapa të tjerë.
“Kisha preferuar që kjo mos të ndodhë sepse kjo qeveri nuk ka legjitimitet për veprime të tilla. Kjo qeveri krejt çka duhet të bëjë është të riparoj shkeljet e saj kushtetuese për Asociacionin”, thotë Arifi për tesheshi.com.
I pyetur se ç’veprime do të ndërmerr AAK veç nëse qeveria e ‘Srpska’, dakordohen që të themelohet Asociacioni, Arifi pohon se partia e tij do të “ndërmerr veprime demokratike kundershtuese”, pa treguar se cilat mund të jenë ato.
Ndryshe, Gjykata Kushtetuese e Kosovës më 23 dhjetor 2015-të ka konstatuar se parimet e përgjithshme të Asociacionit të komunave me shumicë serbe nuk janë tërësisht në përputhshmëri me frymën e Kushtetutës. /tesheshi.com/
