Nga Bashkim Kastrari
Qeveria e Kosovës ka udhëzuar Autoritetin Rregullativ të Komunikimeve Elektronike dhe Postare që të bëjë autorizimin e përkohshëm dhe të kufizuar për Operatorin e ri serb i telefonisë mobile, “MTS” që pritet të fillojë së punuari në Kosovë, nga koha kur vendit do t`i miratohet kodi telefonik 383.
Ministri i Zhvillimit Ekonomik, Blerand Stavileci ka bërë të ditur se fillimi i operimit të këtij operatori është në përputhje me negociatave që janë zhvilluar në Bruksel ndërmjet Kosovës dhe Serbisë.
Por, lejimi i operatorit të ri serb, të telefonisë mobile “MTS” që pritet të fillojë së punuari në Kosovë ka nxitur reagime të ndryshme. Lejimi i operatorit në fjalë po kundërshtohet nga partitë opozitare, aktivistë të shoqërisë civile dhe ekspertë të fushës së telekomunikacionit.
Lëvizja Vetëvendosje ka reaguar ashpër ndaj lejimit të operatorit serb dhe ka shprehur qëndrimin se kjo marrëveshje duhet të kundërshtohet fuqishëm dhe se përgjegjësit duhet t’i përgjigjen popullit.
Kryetari i VV-së Visar Ymeri, ka thënë se kompania të cilës duan t’i japin leje për operim, është kompani shtetërore e Serbisë dhe se me këtë bëhet integrim i plotë i sistemit të Serbisë në Kosovë.
“Kjo natyrisht që është një çështje shtetërore dhe nuk mund të vendoset në këtë mënyrë. Aq më pak të lejohet e të durohet që një kompani shtetërore të ofrojë shërbime telekomunikimi brenda një shteti tjetër, duke pasur parasysh jo vetëm aspektin e sovranitetin dhe zhvillimit ekonomik, por veçanërisht edhe atë të sigurisë. Sepse është çështje sigurie se kush dhe si i kontroll bisedat telefonike, këmbimet tjera të komunikacionit mes qytetarëve të një vendi. Rrjeti i telefonisë prej Kosovës në Serbi, do të konsiderohet lokal”, ka thënë Ymeri.
Ndër të tjera Ymeri bëri të ditur se do të vazhdojnë kundërshtimin e marrëveshjeve me Serbinë, përshirë edhe këtë për kodin telefonik, me metodat e njëjta siç i kanë praktikuar deri tani.
Serbia përgjon Kosovën me kodin telefonik 383!
Ismet Hamiti, ekspert i telekomunikacionit në këtë lëvizje, ka thënë se Kodi për Kosovën mund të zgjidhet pa Serbinë. Sipas tij, zgjidhja do te ishte aplikimi i rezolutës se Kuvendit, me kodin 355 të Shqipërisë.
Ai ka thënë se marrëveshja për kodin telefonik ka rëndësi në fushën e sigurisë, përgjimeve dhe se nuk ka vend në botë që e lejon që kompania e shtetit tjetër të operojë në shtetin tjetër. Ai mendon se do të ketë pasoja në sigurinë e Kosovës dhe për këtë arsye kjo marrëveshje duhet të kundërshtohet fuqishëm dhe përgjegjësit duhet t’i përgjigjen popullit.
“Kodi ndërkombëtar për Kosovën mund të zgjidhet pa Serbinë. Dhe këtë publiku duhet ta dijë, se pse e kanë futur këta në lojë Serbinë, unë nuk kam shpjegim. Kosova edhe pa qenë anëtare e OKB-së mund të aplikojë për kodin ndërkombëtar, këtë ia lejon Kushtetua e ITU-së… pse nuk e kanë bërë këtë, pse e kanë zgjedhur atë rrugë përmes Serbisë, unë nuk kam shpjegim dhe nuk ka asnjë shpjegim racional që të më bind se kjo ka qenë rruga e duhur. Pasojat do të jenë fatale për sovranitetin e shtetit tonë kështu duke u prekur edhe çështjet e sigurisë brenda shtetit”, ka thënë Hamiti.
AAK: Serbia futet në Kosovë edhe përmes telefonisë mobile
Aleanca për Ardhmërinë e Kosovës (AAK) konsideron se vendimi i Qeverisë së Republikës së Kosovës, në të cilin udhëzon Autoritetin Rregullativ të Komunikimeve Elektronike dhe Postare që të lëshojë autorizimin e përkohshëm dhe të kufizuar për operim të ndërmarrjet së re ‘MTS’ D.O.O., është vendim i pa precedencë në praktikat e mira ndërkombëtare, në të cilin qeveria udhëzon institucionin përgjegjës për rregullimin e komunikimeve elektronike ta çrregullojë atë duke shkelur normat dhe standardet në tregun evropian dhe në Ligjin për Komunikimet Elektronike.
“Këto standarde përcaktojnë qartë procedurat dhe mënyrën e fitimit të drejtës për të operuar, bazuar në kornizën rregullatore të BE-së, në kushte të konkurrimit të barabartë dhe të ndarjes së resurseve numerike dhe frekuencore. Qeveria e Kosovës, de fakto udhëzon Autoritetin Rregullativ i Komunikimeve Elektronike dhe Postar t’i shkelë të gjitha këto kritere e procedura për t’i mundësuar shtetit tjetër, Serbisë, të operoj në Kosovë automatikisht, një mundësi që operatorët nuk e kanë as në vet Serbi. Prandaj AAK e kundërshton fuqishëm këtë vendim të qeverisë, sepse ai është në kundërshtim me të gjitha rregulloret e vendit dhe ndërkombëtare që e rregullojnë këtë fushë.”
Në lidhje me këtë çështje, ka reaguar edhe Avni Zogiani, ish-drejtor i organizatës ÇOHU! e cila ka realizuar hulumtime të shumta në fushën e telekomit dhe ndikimeve politike në fushën e telefonisë mobile. Ai përmes një reagimi në rrjetin social facebook ka deklaruar se përmes marrëveshjeve për telefoninë mobile, Serbia po futet brenda në Kosovë.
“Kod telefonie me Serbinë kemi pas, na menduam që po na e sjellni një kod qe nuk asocion me këtë shtet prej të cilit u munduam me ikë me lufte”, ka thënë Zogiani. /tesheshi.com/
