Nëse jeni të pastër, rrini të qetë. Kështu u shpreh kryetari i Gjykatës së Lartë, Xhezair Zaganjori, në 20 vjetorin e themelimittë shkollës së Magjistraturës, duke pasur parasysh, nisjen e proçesit të vetingut ndaj sistemit të drejtësisë.
Zaganjori tha se pjesa më e shëndoshë e sistemit do të zgjidhet në institucionet e drejtësisë, ndërsa shtoi se vetingu fillimisht duhej të përfshinte politikën, pastaj drejtësinë.
“Theksoj se shtrirja kohore e ndryshimeve kushtetuese e ligjore dhe ngritja e institucioneve të reformës duhet të kishte qenë shumë më e shkurtër. Megjithatë, tashmë implementimi duhet të fillojë shpejt me vetingun, i cili normalisht mund dhe duhej te kishte filluar me kohë me politikën. Megjithatë, ky ka qenë vullneti i ligjvënesit dhe i partnerëve ndërkombëtarë dhe ne padyshim që duhet jo vetem ta respektojmë, por edhe t´a mbështesim fuqimisht, ashtu si deri tani, me seriozitet, dinjitet e angazhim konkret”, tha Zaganjori.
Në vijim ai ftoi pjesëtarët e sistemit që të jenë të qetë, pavarësisht insinuatave, keqkuptimeve apo provokimeve.
“Nëse ndjeheni të pastër e në paqe me vetvehten, nuk ka arsye të shqetesoheni e alarmoheni. Personat që jane problem, përgjithesisht dihen e njihen nga të gjithë.
Përsëris se unë jam i sigurt se pjesa dërrmuese e magjistratëve, gjyqtarë e prokurorë, kanë punuar dhe punojnë jo vetëm me profesionalizem, por edhe me përkushtim, dashuri për profesionin dhe me integritet.
Sociologu dhe juristi i shquar francez Albert Cammy thotë se “..kur ke integritet, të tjerat nuk kanë rëndësi, por edhe kur nuk ke integritet, serish çdo gje tjetër është pa vlerë”.
Sigurisht që integriteti veçanërisht në drejtësi ka një dimension e rëndësi të jashtëzakonshme, sepse pikërisht këtu mbështetet edhe vetë nocioni i drejtesisë”, tha ai. /tesheshi.com/
