Kryetari i Gjykatës së Lartë, Xhezair Zaganjori është takuar sot me Ambasadorin e Shteteve të Bashkuara të Amerikës në Tiranë, Donald Lu dhe Ambasadoren e Bashkimit Evropian në Tiranë, Romana Vlahutin, me të cilët është shprehur se duhen bërë ndryshime për të kthyer besimin tek drejtësia.
Zaganjori u shpreh mbi situatën në gjyqësor dhe nevojën për ndryshime të mëdha e të thella që kërkohen për integrimin e vendit në strukturat e BE-së, forcimin e shtetit ligjor si dhe rikthimin e besimit të publikut tek drejtësia.
Ai informoi ambasadorët mbi arritjet e realizuara, problematikat e hasura dhe sfidat e përditshme me të cilat përballet Gjykata e Lartë.
Zaganjori tha se Gjykata e Lartë, por edhe sistemi gjyqësor në tërësi ka qenë bashkëpunues në procesin e reformave nëpër të cilat po kalon ky sistem, duke caktuar përfaqësuesit e tij në grupet e punës të ngritura për këtë qëllim.
Ai falenderoi përzemërsisht për mbështetjen dhe ndihmën e vazhdueshme që kanë dhënë SHBA dhe BE në drejtim të përmirësimit të performancës dhe eficencës së sistemit gjyqësor, duke uruar që kjo ndihmë të vazhdojë edhe në të ardhmen.
Nga ana e tyre, ambasadorët Lu dhe Vlahutin vlerësuan përpjekjet e deritanishme në drejtim të proceseve reformuese si dhe siguruan vazhdimësinë e asistencës së tyre për realizimin me sukses të këtyre reformave./tesheshi.com/
