Dy ditë para se presidenti i shtetit në Maqedoni, Gjorgje Ivanov të caktojë mandatarin për formimin e qeverisë, që me shumë gjasë do jetë VMRO-ja si fituese e zgjedhjeve, lideri i LSDM-së, Zoran Zaev i shoqëruar nga sekretari gjeneral i partisë, Oliver Spasovski kanë befasuar opinionin e gjerë, kështu duke realizuar një takim të papritur me krerët e Lëvizjes BESA. Mirëpo për dallim nga takimet e zakonshme ku dy parti politike i realizojnë në ambiente të lokaliteteve publike, kësaj rradhe LSDM shkroi historinë duke qenë partia e parë maqedonase që viziton një parti shqiptare në selinë e saj.
Ky takim ishte aq i papritur dhe spontan sakaq vërehej edhe mungesa e mediumeve. Megjithatë në dalje të kreut të LSDM-së, pas përfundimit të takimit, gazetarët vërshuan selinë e Lëvizjes BESA.
Sipas Zaev, bëhet fjalë për takim të zakonshëm, dhe takime të tilla do të realizojë edhe me partitë tjera shqiptare.
“Ishte një takim i zakonshëm paszgjedhor, ndërsa do të realizojmë takime të këtilla dhe me partitë tjera shqiptare”, tha shkurt Zaevi, duke mos pranuar të përgjigjet nëse tashmë u ka dërguar ftesë për takim edhe BDI-së, Aleancës për Shqiptarët dhe PDSH-së.
Nga ana tjetër nënkryetari i Lëvizjes BESA, njëherësh deputet, Zekirija Ibrahimi ka thënë se takimi me drejtuesit e LSDM-së është në frymën e takimeve që realizohen këto ditë për të ardhmen e shtetit.
“Megjithëse takimi ishte joformal, mund t’ju them se kemi këmbyer ide se si mund të kthehet vendi në agjendën euro-atlantike, se cili duhet të jetë kursi i shtetit në të ardhmen dhe se si mund të bëhet kjo. Ka qenë një takim për parimet e mundshme e një bashkëpunimi të ardhshëm pa ndonjë gjë konkrete”, është shprehur Ibrahimi.
Ndryshe, presidenti Ivanov po shfrytëzon maksimalisht afatin përfundimar për caktimin e mandatarit që do të formonte qeverinë, që sipas kushtetutës i takon partisë e cila ka fituar më së shumti deputetë. Ky afat kalon më 9 shkurt. Dhe nëse VMRO si parti fituese e zgjedhjeve nuk arrin që të bind për koalicion partitë nga blloku politik shqiptar brenda 20 ditësh, atëherë mandatin për formimin e qeverisë sipas kushtetutës e fiton partia e dytë në renditje sipas numrit të deputetëve, në këtë rast LSDM-ja.
M.Krasniqi – /tesheshi.com/
