Nëse opozita përpiqet të pengojë të ardhmen e Maqedonisë në BE dhe NATO për shkak të llogaritjeve personale, koalicioni qeverisës do të detyrohet të shpallë zgjedhje të parakohshme, tha kryeministri maqedonas Zoran Zaev.
“Ne do të bëjmë gjithçka për të siguruar shumicën e nevojshme në parlament për ndryshime kushtetuese. Megjithatë, nëse opozita përpiqet të pengojë të ardhmen e Maqedonisë për interesa personale, zgjedhjet janë të pashmangshme”, tha Zaev në një intervistë me BHTV1, e para pas referendumit të së dielës mbi ndryshimin e emrit, i cili dështoi në treguesit e pjesëmarrjes.
Zaev tha se ishte i bindur se opozita e mbështet hyrjen e vendit në BE, por që për shkak të llogaritjeve politike ajo po bënte atë që po bënte.
“Edhe udhëheqësi i opozitës që ka bojkotuar referendumin, nëse i kërkoni atij të thotë ‘Po’ për BE-në dhe NATO-n, patjetër që do e bënte dhe unë e besoj këtë. Por ai dëshiron që partia e tij të kthehet në pushtet dhe me aspiratat e tilla të rrezikojë të ardhmen e vendit tonë. E ardhmja e Maqedonisë është në rrezik dhe secili është përgjegjës për atë që është mbi mua, mbi udhëheqësin e opozitës dhe partitë politike”, tha Zaev.
I pyetur nëse lloji i pyetjes në referendum ishte arsyeja për një pjesëmarrje të dobët, Zaev u përgjigj:
“Ne jemi të gjithë për BE-në dhe NATO-n dhe jemi të vetëdijshëm se nuk do të ketë as BE, as NATO pa një marrëveshje me Greqinë”. /tesheshi.com/
