Pasi ka kundërshtuar fort 24 prillin si datë zgjedhjesh, lideri i opozitës maqedonase, Zoran Zaev, ka propozuar dy data ta tjera alternative, 5 qershorin ose 5 korrikun.
Në një konferencë për shtyp, Zaev ka ripërsëritur qëndrimin e tij se për momentin nuk ka kushte për zgjedhje të lira dhe demokratike me datë 24 prill.
Sipas tij, pasi që janë kapërcyer të gjitha afatet nga Marrëveshja e Përzhinos nuk mundet që të respektohet as data e mbajtjes së zgjedhjeve.
Pretendimi kryesor mbetet ai për kohën e pamjaftueshme për të pastruar listat zgjedhore, edhe pse para pak ditësh ka nisur një process elektronik për t’i sjellë ato në parametra normalë.
Por opozita as këtë nuk e pranon, derisa pastrimi nuk bëhet “derë më derë”, siç pretendon ajo se duhet bërë.
Opozita në përgjithësi, pra jo vetëm LSDM-ja maqedonase, i frigohet faktit se vetëm me manipulim listash mundet që VMRO – BDI-ja të mund të fitojë sërish.
Dhe me ç’po duket, mosdakortësia mbi 24 prillin si datë e zgjedhjeve të parakohshme, do jetë ngërçi i rradhës i politikës maqedonase. /tesheshi.com/
