Pas një periudhe të gjatë zvaritjeje nëpër gjykata, kryeministri i Maqedonisë Zoran Zaev i cili ishte i akuzuar se gjatë kohës derisa ishte kryetar i qytetit të Strumicës ka kërkuar ryshfet nga një biznesmen i këtij qyteti, është liruar nga aktakuza.
Kjo u tha në aktvendimin e sotëm në Gjykatën Penale në seancën e Këshillit Gjyqësor për rastin e deritanishëm “Mitëmarrja”.
Pas aktvendimit, Zaev deklaroi se e ka pritur këtë finalë pasi sipas tij vepra është rikualifikuar, ndërsa mbrojtja ka dëshmuar se nuk ka pasur qëllim për ryshfet.
Megjithatë, ai tha se ka ndjerë jo pak stress, ndonëse e natyrshme në situata të tilla.
Ai është i kënaqur nga aktvendimi, që sipas tij, tregon edhe për lirimin e gjyqësorit nga presionet që i ka pasur në të kaluarën.
Lidhur me deklaratat e ish-kryeministrit Nikolla Gruevski ku thoshte se Zaev do të lirohet, ndërsa ai do të dënohet për rastin “Tenk”, kryeministri tha se Gruevski një kohë ka qenë njohës i mirë i gjyqësisë, por që tani nuk është ajo gjyqësi e njëjtë që e kontrollonte ai. /tesheshi.com/
