Pas shtatë vitesh i burgosur, dje ka dalur nga qelitë e burgut të Idrizovës biznesmeni dhe ish-pronari i televizionit më të mirë në Maqedoni, A1, Velija Ramkovski.
Ndonëse ai kishte edhe 6 vite tjera për të qëndruar në burg, autoritetet brenda kanë vendosur që ta lirojnë në mënyrë që të trajtohet për probleme shëndetësore pranë të familjes.
Pas lirimit të tij, ai shihet i buzëqeshur në gjirin familjar.
Fotografinë e Ramkovskit me valixhe në dorë e ka bërë publike vajza e tij, Emel Ramkovska, gjithashtu e burgosur por e liruar më herët nga vuajtja e dënimit.
Ramkovski është burgosur nga qeveria e atëhershme për të vuajtur dënimin për fshehje tatimi. Kjo ishte arsyeja zyrtare, por në të vërtetë, në opinion njihej si “burgosje politike” dhe sulm ndaj mediave të pavarura.
Tani pas lirimit të tij, në opinion ka filluar të flitet për rihapjen e televizionit A1, si një ndër mediat më profesionale në Maqedoni.
Profesionalizmi i A1-shit nuk i shkonte përshtat partisë VMRO-DPMNE e cila asnjëherë nuk arriti që këtë medium ta vë nën kontrollin e pushtetit.
Kështu, ish-kryeministri Nikolla Gruevski vendosi që të mbyllë televizionin A1 me pretekst se pronari saj i ka ikur tatimeve.
Kujtojmë se qeveria e re nën udhëheqjen e Zoran Zaevit, para se të vinte në pushtet kishte publikuar disa biseda të përgjuara për montimin e rastit të A1-shit dhe burgosjen e Velija Ramkovskit.
Që atëherë Zaev u zotua se në rast të ardhjes në pushtet të LSDM-së, do të ketë drejtësi për gjitha rastet e montuara, përfshirë këtu edhe rastin e Ramkovskit.
Ja që sot Zaev po e mban fjalën për lirimin e Ramkovskit, mirëpo që ka harruar se votat e shqiptarëve i ka fituar duke premtuar lirimin e të burgosurve shqiptarë si për rastet “Monstra”, “Sopoti”, “Lagjja e Trimave” etj.
Po bëhen 4 muaj nga udhëheqja e tij si kryeministët i vendit, dhe të burgosurit e pafajshëm shqiptarë vazhdojnë të vuajnë nëpër burgje.
M.Krasniqi – /tesheshi.com/
