Kryeministrat Aleksandër Vuçiç dhe Zoran Zaev duket se janë angazhuar për të qetësuar raportet e krijuara së fundmi mes dy vendeve, pas tërheqjes së personelit të ambasadës serbe nga Shkupi me pretekstin se Maqedonia do të votojë pro anëtarësimit të Kosovës në UNESCO
Zaev dhe Vuçiç kanë zhvilluar sot një bisedë telefonike, e cila është pasuar me një deklaratë të përbashkët, në të cilën nuk përmendet asnjë incident mes dy vendeve.
Sipas deklaratës, kryeministrat kanë rënë dakort që Maqedonia dhe Serbia çdo mospajtim në marrëdhëniet e përbashkëta ta zgjidhin nëpërmjet dialogut.
“Lidhur me disa çështje politike rajonale, Maqedonia dhe Serbia së bashku do të luftojnë jo vetëm për mirëmbajtjen, por edhe avancimin e marrëdhënieve miqësore mes popullit maqedonas dhe serb dhe qytetarëve të dy vendeve”, thuhet në deklaratë.
Ata gjithashtu kanë rënë dakort se Maqedonia dhe Serbia duhet të bëjnë përpjekje të shtuar për përmirësimin e mëtejshëm të marrëdhënieve ekonomike dhe rritjen e shkëmbimit tregtar mes dy vendeve.
“Republika e Maqedonisë dhe Republika e Serbisë në përputhshmëri me normat ndërkombëtare, në vullnet të mirë dhe mbi baza miqësore do të mbrojnë të drejtat dhe interesat e përfaqësive diplomatike-konzulare në territorin e tyre. Republika e Maqedonisë dhe Republika e Serbisë do të intensifikojnë komunikimin e ndërsjellë në nivelin më të lartë, do të përkrahin njëra-tjetrën në rrugën euroatlantike dhe do t’i përforcojnë marrëdhëniet fqinjësore dhe stabilitetin në rajon”, thuhet në deklaratën e përbashkët. /tesheshi.com/
