Shefi i lëvizjes Vetëvendosje, Visar Ymeri, me anë të një statusi në Facebook, i është kundërpërgjigjur kryeministrit Mustafa, i cili arsyetoi krijimin e asociacionit të komunave serbe, duke sqaruar, si tha, kundërshtitë që ka hasur në publik kjo temë.
Ymeri shkruan se Mustafa po flet me gjuhën e dorëzimit. Sipas tij, këto vite Kosova nuk ka ndalur as korrupsionin, as mafian dhe as varfërinë, por a është kjo një arsye për të legalizuar të gjitha këto.
Logjika e kryeministrit, sipas shefit të Vetëvendosjes, është “meqë për 16 vjet nuk e kontrolluam veriun, le ta legalizojmë këtë moskontroll”.
“Por ne për 16 vjet nuk e kemi ndalur dot as korrupsionin, mafian, varfërinë etj. Mos vallë, sipas logjikës impotente të kryeministrit duhet t’i legalizojmë edhe këto”, vëren ai.
Më tej, Ymeri deklaron se kryeministri nuk duhet të çojë shtetësinë e Kosovës në dorëheqje, por veten, meqë nuk qenka në gjendje të gjejë alternativa të tjera për Kosovën pos Zajednicës. /tesheshi.com/
