Ylli Ndroqi, president i Ora News, i është kthyer çështjes së tij, pra hetimeve nga SPAK për të, pas një urdhër sekuestroje.
Ai thotë se në ditët në vijim do ketë supriza, duke aluduar se ndaj tij po ka një skemë të qartë politike. Ndaj, për këtë, falenderon dhe Berishën që po i bëhet krah me postimet e tij te “Qytetari Dixhital”.
“Muaji gusht duhej t’i dedikohej pushimeve dhe çlodhjes pranë familjes dhe të afërmve, por tashmë e dini, se ata, që ‘kujdesen’ për prapaskenat ndaj Ora Neës nuk ndalojnë.
E për hedhjen dritë mbi disa prej tyre, falënderoj Doktor Berishën për publikimin e nismës më të re që po përgatitet nga Ministria e Brendshme për sekuestrimin e arkivës së televizionit tonë.
Ju siguroj se askush nuk mund të vërë dorë mbi historinë 14 vjeçare, mbi të thënat e të pathënat e më shumë se një dekade. Jo vetëm, por askush nuk mund të ndalojë suprizat, që do të vijnë…edhe pak, durim!”, shkruan Ndroqi.
Sipas tij, gjithçka bëhet për të nënshtruar Ora-n e tij, për të cilën beson se është një media që shqetëson pushtetin me të vërtetat e profesionalizmin e tij.
“Për ata që menduan se RTV Ora dhe Ora Neës do të nënshtroheshe, dëshmuat se dini të jeni profesionistë dhe keni kurajon të publikoni të vërtetat. Ndërsa miqtë e mi i siguroj se e vërteta e kësaj historie do të dalë shpejt dhe bashkë me të dhe shumë të tjera!”, përfundon Ndroqi.
Kujtojmë se për procesin ndaj Ndroqit, ambasada amerikane ka dalë me dy deklarime brenda një orë, duke përcjellë mesazhin e mbështetjes së fuqishme për organet ligjzbatuese. /tesheshi.com/
