Lideri kinez, Xi Jinping pritet të çimentojë pushtetin me anë të planit për të hequr nga kushtetuta kufizimin prej dy mandatesh në krye të shtetit. Shefat e partisë Komuniste të Kinës propozuan ndryshime kushtetuese me qëllimin që presidenti të vijojë drejtimin e shtetit.
Xi Jinping është konsideruar si lideri me më shumë ndikim në Kinë që prej kohës së Mao Cedunit. Ai duket se e ka përforcuar akoma edhe më shumë kontrollin e pushtetit pasi Pekini njoftoi planet për heqjen e kufizimit të dy mandateve në pushtet.
Agjencia zyrtare e lajmeve në Kinë, “Xinhua”, njoftoi të dielën lajmin dramatik me anë të një njoftimi prej 36 fjalësh. Vendimi hap rrugën për XI që të qëndrojë në pushtet edhe dekadën e ardhshme dhe ndoshta përtej saj.
Raporti thotë se komiteti qendror i partisë Komuniste prej 205 anëtarësh ka propozuar modifikimin e kushtetutës së Kinës kështu që mund të hiqet pjesa ku thuhet se presidenti dhe zëvendësi i tij nuk mund të shërbejnë më shumë se dy mandate të njëpasnjëshme.
Ekspertët kanë reaguar me tronditje ndaj lajmit. Ata mendonin se një gjë e tillë nuk do të ndodhte, pasi bëhet fjalë për një lëvizje shumë të guximshme dhe agresive. Mund të jetë një sinjal se Xi Jinping parashikon të qëndrojë në pushtet deri përtej vitit 2023.
Sipas tyre, për pasojat e një vendimi të tillë, nuk duhet shkuar shumë larg, por mjafton të shohësh pak më në perëndim, në Rusi. /tesheshi.com/
