Në një intervistë të rrallë, ish-presidenti amerikan, Xhorxh W. Bush dha komentet e tij për administratën Trump, shefin e Shtëpisë së Bardhë dhe sidomos marrëdhëniet e tij me shtypin, të cilat kanë qenë në fokus të kritikave dhe analizave të shumta përgjatë ditëve të fundit. Kështu, duke folur për shfaqjen “Today” në NBC, ish presidenti – që ka komentuar shumë rrallë çështje politike gjatë presidencës Obama – ofroi kritika ndaj politikave të administratës Trump dhe marrëdhëniet e diskutueshme të tij me shtypin. Presidenti i 43-të amerikan u ndodh në shfaqje për të promovuar librin e tij të ri “Portretet e Kurajos”, një seri portretesh të veteranëve të plagosur.
Ja disa nga pikat më të rëndësishëm të intervistës së tij:
Xhorxh Bush bëri thirrje për përgjigje sa i takon lidhjeve të mundshme midis Rusisë dhe fushatës së Trump. Ai tha se mbështet një hetim që eksploron lidhjet e mundshme. “Mendoj se ne të gjithë kemi nevojë për përgjigje”, tha Bush për drejtuesin e emisionit, Matt Lauer.
Bush, sidoqoftë, nuk tha nëse është i nevojshëm caktimi i një prokurori special, por në vend të kësaj mori anën e rekomandimeve që vijnë nga kreu i Inteligjencës së Senatit, Richard Burr.
“Nuk jam i sigurtë për rrugën e drejtë që duhet marrë. Jam i sigurtë, që kjo çështje duhet të marrë përgjigje”, shtoi ai.
Ndërkaq, Bushi mbrojti median si një kontrollore të “varësisë nga pushteti”. Ai kritikoi konfliktin e Trump me median, duke e quajtur këtë fundit si “të domosdoshëm për demokracinë”.
“Pushteti mund të jetë shumë magnetik. Dhe mund të jetë gërryes. Dhe është e rëndësishme për median që të mbajë njerëzit përgjegjës kur ata abuzojnë me pushtetin”.
Bush tha se gjatë kohës së tij si president, ai u përpoq të bindë presidentin rus, Vladimir Putin për rëndësinë e një shtypi të pavarur.
Bush për politikën e Trump për emigracionin
I pyetur për urdhërin ekzekutiv që ndalon emigracionin e njerëzve nga shtatë vende me shumicë muslimane, e nëse kjo politikë e bën më të vështirë luftën ndaj terrorizmit, nëse Shtetet e Bashkuara marrin pozicion mbrojtës, Bush u përgjigj: “Eshtë e vështirë të kryesh luftën ndaj terrorizmit, nëse je në tërheqje. Dhe unë mendoj se ne e kemi marrë këtë mësim”.
“Nëse Shtetet e Bashkuara vendosin të largohen përpara se një shoqëri e lirë të dalë nga konflikti, do të jetë më e vështirë për t’i mposhtur ata”, tha ai. “Armiku është shumë i mirë në shfrytëzimin e dobësive. Do të jetë shumë e rëndësishme. Nëse qëllimi është mposhtja e ISIS, që unë besoj se duhet të jetë, ne duhet të projektojmë fuqi. Tani, mënyra si zhvillohen politikat e brendshme, ndihmon ose jo”.
Kur u vendos nën presionin e pyetjes nga Lauer nëse ai mbështet ndalimin e Trump, Bush nuk dha një përgjigje përfundimtare “po” apo “jo”.
“Jam për një politikë emigracioni që mirëpret dhe zbaton ligjin”, u përgjigj ai.
Ndasitë me të cilat përballet Amerika
Bush reflektoi edhe për ndasitë me të cilat përballet vendi.
Ai qeshi me përshkrimin për Trump se “masakron” gjithë Amerikën, por vuri në dukje ndasitë e krijuara.
“Ne ishim goxha të ndarë kur unë isha president, ose pak më vonë se të merrja detyrën. Ne u bashkuam pas 11 shtatorit”, tha ai. “Një pjesë e këtij uniteti u shpërbë, por situata kërkon që ne të gjithë të jemi të kuptueshëm për mënyrën sesi mendon tjetri”.
Por, aq ndarë sa mund të duket vendi, Bush vuri në dukje se ndasitë ishin “shumë më të këqija”, gjatë viteve 1960.
I pyetur sesi Trump mund të ndihmojë në shërimin e këtyre ndasive, ai tha se presidentit duhet t’i jepet pak kohë.
“Para së gjithash, ka vetëm një muaj në detyrë”, tha Bush. “Së dyti, unë mendoj se duhet t’i besojmë fjalëve të tij se dëshiron ta unifikojë vendin. Do ta shohim sesa në gjendje do të jetë ta përmbushë këtë synim. Është e vështirë të unifikosh vendin, ndërsa median e ke kaq të përçarë”.
Përgatiti: Juli Prifti – /tesheshi.com/
