Në kulmin e një (vetë)promovimit të Shqipërisë si vend me tërheqje të jashtëzakonshme turistike, si për ironi, “xhevahir në Ballkan” cilësohet një tjetër vend, më saktë qytet.
Evropa nuk ka mungesë të plazheve të lë pa frymë dhe shesheve me kalldrëm që veprojnë si skena filmash, dhe një vend i tillë është në Malin e Zi fqinj, shkruan britanika Express.
“Duke marrë parasysh sa shumë ka për të ofruar kontinenti, edhe udhëtarëve më me përvojë mund t’u mungojë një xhevahir ballkanik”, shkruhet aty për Kotorrin.
Ky qytet në Mal të Zi, i cili mbrohet nga UNESCO që nga viti 1979, është një nga destinacionet mesdhetare më të nënvlerësuara në Evropë, sipas gazetës së lartpërmendur.
Qytetet simpatike mesjetare të Malit të Zi dhe bregdeti mahnitës në detin Adriatik e kanë bërë atë një nga destinacionet më të bukura turistike.
Plot rrugë dredha-dredha dhe kisha të shumta romane, Kotorri është, sipas ekspertëve të udhëtimit nga Samboat, një nga perlat mesdhetare më të nënvlerësuara falë “bukurisë së qytetit të vogël”.
I konsideruar si një nga vendet mesjetare të ruajtura më mirë në Adriatik, qyteti ndodhet në Gjirin e Kotorrit, nga ku vizitorët mund të eksplorojnë shumë atraksione në zonë, duke përfshirë shpellat dhe rrënojat mahnitëse natyrore.
Kotorri është gjithashtu një “destinacion i mrekullueshëm lundrimi”, me udhëtime të shumta me varkë që nisen nga gjiri, duke i lejuar vizitorët të shijojnë pamjen nga deti, larg bregut.
Një udhëtim me varkë bën të mundur edhe vizitën e Perastit, i cili është plotësisht pa makina dhe ka një grusht restorantesh me ushqime deti të freskëta.
Dhe vërtet, kush e ka vizitar Kotorrin, lehtë i ngjan i shpifur çdo qytet bregdetar shqiptar. /tesheshi.com/
