Në muajin dhjetor 2016, taksat vendore që mblidhen për llogari të Bashkisë së Tiranës nga UKT (Ujësjellës Kanalizime Tiranë Sh.A.) në faturën e ujit të pijshëm kanë pësuar një luhatje të vlerave në krahasim me muajt e tjerë të po këtij viti si dhe muajit janar 2017.
Në faturat e dy muajve të ndryshëm siç shihet edhe në foton më poshtë, fatura të po të njëjtit abonent, për taksat vendore janë këto vlera në muajt dhjetor 2016 dhe janar 2017, përkatësisht: tarifë pastrimi 380 lekë dhe 420 lekë, taksë mbi ndërtesën 200 lekë dhe 100 lekë (sipërfaqia e ndërtesës mbi të cilën llogaritet taksa është e njëjtë në të dy muajt), taksë e përkohshme për infrastrukturën arsimore 300 lekë dhe 150 lekë, pra në total shkojnë 880 lekë për muajin dhjetor dhe 670 lekë për muajin janar.
Në muajin dhjetor, Bashkia e Tiranës ka mbledhur 210 lekë më shumë në çdo familje. Në Tiranë jetojnë mbi 1.000.000 banorë dhe për efekt të llogaritjes së diferencës në vlerë të taksave vendore supozojmë se kjo shifër përbën 300.000 familje, atëherë të ardhurat e bashkisë rriten me 63.000.000 lekë vetëm në muajin dhjetor.
Kjo rritje e taksave ka rënduar buxhetet familjare, ndërsa Bashkia e Tiranës e ka mbyllur vitin 2016 me rritje të të ardhurave nga taksat vendore vetëm me një “lëvizje të zgjuar” të saj, rritje me 210 lekë të taksave vendore pa njoftuar për këtë veprim qytetarët.
Çuditërisht, në muajin janar 2017 taksat vendore janë rikthyer në normalitet me të njëjtat vlera si dhe në vitin 2016 (përjashtuar muajin dhjetor të këtij viti) siç tregohen në faturën “kopje elektronike, mars 2016” .
Në botë ka vetëm dy gjëra të sigurta: Vdekja dhe Taksat. Qytetarëve ju mbetet veç t’i paguajnë këto taksa, pavarësisht rritjes së tyre dhe mundësisë që kanë për t’i paguar. /tesheshi.com/
