Kanë kaluar 5 vite nga ngjarjet e 21 janarit dhe këtë 21 janar, xhaxhai i një prej viktimave, Aleks Nikës, ka shkruar një letër të hapur, nëpërmjet së cilës kërkon zbardhjen e ngjarjes.
Në letër ai shkruan se sot do të jetë në Bulevard për të vënë një tufë me lule në homazh të nipit dhe se bashkë me të do të jetë edhe Edi Rama.
“Dhimbja për ne është e madhe jo vetëm se trupi i tij po kalbet në varr pa faj, por edhe se dosja e tij ka 5 vjet që myket në Prokurori”,- shkruan në rreshta xhaxhai i të ndjerit Nika.
Ai vijon duke u shprehur se të gjithë i harruan ngjarjet e 21 janarit dhe tragjedinë që u ndodhi atyre.
“Po na vritet shpresa e fundit. Ne nuk presim pafundësisht. I bëjmë thirrje shtetit ta shkundë drejtësinë dhe të dërgojë përpara drejtësisë organizatorët dhe vrasësit që tashmë janë të njohur prej nesh”,- përfundon letra e Mark Nikës.
Gjatë protestës së opozitës më 21 janari të vitit 2011, drejtuar nga Edi Rama, në bulevard u vranë 4 persona./tesheshi.com/
