Kuvendi i Kosovës më 29 dhjetor të 2016-tës miratoi një rezolutë përmes së cilës obligon qeverinë që muri ilegal i ndërtuar nga serbët në veri të Mitrovicës të rrëzohet në janar të 2017-ës.
Pavarësisht kësaj, nënkryetari i Kuvendit dhe i PDK-së, Xhavit Haliti, nuk beson se do rrëzohet muri, derisa e quan të matur vendimin e qeverisë për të mos e bërë një gjë të tillë.
Ai thotë se rrëzimi eventual i murit mund të implikojë reagime të pakontrollueshme dhe kjo nuk është mirë.
Ai në një intervistë për RTK-në flet edhe për koalicionin qeverisës PDK-LDK, për çka thotë se ka hapësirë të veprohet pak më mirë, pasi pranon se deri tani ka pasur pakënaqësi nga të dyja palët
“Unë po besoj që si koalicion do ta kalojë lumin figurativisht deri në zgjedhjet e ardhshme dhe të përmirësojë qeverisjen në fushat që kanë shumë vërejtje. Lufta për korrupsion duhet të jetë e pamëshirshme ndaj secilit njeri në Kosovë kushdo qoftë ai. Gjithashtu vend për përmirësim kanë arsimi dhe shëndetësia”, ka pohuar Haliti.
Ndryshe, kryetari i grupit parlamentar të AAK-së, Pal Lekaj ka bërë të ditur se nëse nuk zbatohet rezoluta, atëherë opozita do të iniciojnë shkarkimin e kryeministrit Isa Mustafa dhe gjithë qeverisë.
