Nënkryetari i Kuvendit të Kosovës, Xhavit Haliti, ka pranuar librin “Kufijtë në dëm të shqiptarëve” të dërguar nga grupi parlamentar Aleanca për Ardhmërinë e Kosovës dhe grupi parlamentar Nisma për Kosovën.
Përmes një statusi në Facebook, Haliti ka falënderuar publikisht kolegët nga dy partitë parlamentare për dërgesën.
Ndërkaq, ka ftuar opozitën për debat lidhur me çështjen e Demarkacionit.
“Sot në sirtarin tim në Kuvendin e Kosovës mora Librin ‘Kufijtë në dëm të shqiptarëve’ (Demarkacioni i vijës kufitare Kosovë- Mali i Zi në historik, ish-jugosllav dhe të së drejtës ndërkombëtare), të autorit Zejnullah Gruda, dërguar nga Grupi Parlamentar Aleanca për Ardhmërinë e Kosovës dhe Grupi Parlamentar NISMA për Kosovën.
Falënderoj publikisht kolegët nga të dy partitë parlamentare për dërgesën, edhe pse nuk ma kishin nënshkruar librin!
Besoj në vullnetin e mirë të opozitës që së shpejti të ulemi së bashku në institucione (komisione parlamentare dhe seancë plenare) për të debatuar haptas për Demarkacionin e vijës kufitare Kosovë- Mali i Zi”, ka thënë Haliti.
/tesheshi.com/
