Pak ditë pasi kryekuvendari Kadri Veseli, ja ndali fjalën vetëvendosësit Frashër Krasniqi, rrugën e tillë e ka ndjekur edhe nënkryetari i Kuvendit, Xhavit Haliti, i cili ja ka ndërprerë fjalën po një deputeti të VV-së, konkretisht Fitore Pacollit.
Kjo ndodhi derisa Pacolli gjatë fjalimit të saj në seancën e jashtëzakonshme për përjashtimin e Kosovës nga EQAR, bëri thirrje për protesta nga ana e studentëve, pasi tha se pushteti e ka kap shtetin.
Haliti reagoi menjëherë duke thënë se nuk lejon thirrje të tilla, ndërsa tha se Vetëvendosje e ka djegë Parlamentin e Kosovës.
Por deputetja Pacolli vazhdoi të fliste edhe pse regjia ja ndali mikrofonin, dhe duke parë që ajo nuk ndalej, kryesuesi Haliti lëshoi pe dhe i tha regjisë t’ia lëshoi mikrofonin, por që i tha Pacollit të mos bën thirrje të tilla.
Pasi përfundoi fjalën vetëvedosësja Pacolli i tha Halitit që më kurrë mos t’ia ndalë mikrofonin, ndërsa ky i fundit ju kundërpërgjigj duke i thënë se “ta ndali mikrofonin ty e atij që ta ka shkru fjalimin”.
