Hytbeja e së premtes është një mesazh që nuk mungon asnjëherë në xhami, dhe temat zakonisht janë të natyrës shpirtërore, por që lidhen me kontekstin aktual.
Por së fundmi, institucioni fetar në Kosovë, BIK, po merr rol mjaft aktiv në çështjet për të cilat po shqetësohen më së tepërmi qytetarët, e të cilat kanë dimension social.
BIK ka bërë me dije se këtë të premte, e gjithë ligjërata fetare do t’i kushtohet kujdesit në trafik. Të gjitha xhamitë anembanë vendit do të japin mesazhe për rëndësinë e vigjilencës, durimit dhe kujdesit për jetën, duke qenë se së fundmi aksidentet fatale në Kosovë kanë qenë thuajse të përditshme.
Fushata të ngjashme sensibilizuese bëhen shpesh, por duke e ditur se xhamitë në mbarë Kosovën janë të stërmbushura, kjo priet të japë tejet efekt.
Slogani i njohur “mos u ngut, dikush të do në shtëpi” ka qenë mjaft i popullarizuar verën e kaluar, e që fatkeqësisht kjo stinë përkon me shtimin e numrit të fataliteteve në aksidente.
Me shprehjen se “dikush të do fort në shtëpi”, por sigurisht edhe mbi atë se Zoti do që të kujdesesh për veten dhe tjetrin, ligjërata e sotme do të prek edhe rëndësinë e respektimit të rregullave të trafikut, siç bëjmë me rregulla të tjera në jetë.
Kujtojmë se BIK po bëhet më i vëmendshëm lidhur me trajtimin e temave sociale që po shqetësojnë vendin. Javën e kaluar, në altoparlantët e xhamive dëgjoheshin mesazhe këshilluese kundër përdorimit të drogës, një alarmim ky nga Taks-Forca Kombëtare anti-drogë. Ndërsa para asaj jave, në mbarë xhamitë u dëgjuan ligjërata mbështetëse për gratë e dhunuara në luftë, ku imamët nuk hezituan t’i quajnë nëna dhe motra të pastra dhe të pafajshme. /tesheshi.com/
