Nga Mensur Krasniqi
Dikur tranzit-xhami, e tani në zemër të Sarajit, por që i bie të jetë periferike. Eshtë kjo Xhamia e lashtë e ‘Husein Shah’. Kjo xhami daton që nga viti 1553, ose 961 të kalendarit islam “Hixhrit”. Themelues i kësaj xhamie në kohën e sundimit osman para 500 viteve në Maqedoni, thuhet se ka qenë turku Husein Shah, emrin e të cilit sot e kësaj dite e mban vet xhamia në periferi të Shkupit, komuna Saraj.
Në Shkup e rrethinë, për këtë xhami flitet se është njëra ndër xhamitë më të vjetra në Maqedoni, Karakteristikë tjetër për xhaminë ‘Husein Shah’ është autenticiteti saj, meqë në këtë xhami asnjëherë nuk është bërë ndonjë rinovim i tërësishëm, pra ende mund të shihen ato dyer dhe ballkone të drurit, ashtu siç e kishte ndërtuar aso kohe Huseini.
Pak para kohës së namazit të drekës portali tesheshi.com ka vizituar këtë xhami, ku në oborrin e saj rastisi mixhën Selam, anëtar i Këshillit të Xhamisë gati dy dekada. Mixha Selam, ndonëse në moshë të vjetër, aspak nuk hezitoi që t’na hap dyert e xhamisë para kohës së namazit në mënyrë që të shkrepim disa fotografi për lexuesit e portalit tonë.
Njëkohësisht, bashkë me mixhën Selam na shoqëroi edhe një djalosh i ri, Besir Mustafa, xhemat i rregullt i kësaj xhamie. Sipas tij xhamia e ‘Husein Shah’ është zemra e Sarajit.
“Këtu vijnë shumë xhemat meqë xhamia gjendet në zemrën e Sarajit”. Këtë xhami gjithnjë e kanë vizituar figura të ndryshme”, shprehet Besiri.
Ajo çka e shqetëson të riun është fakti që përfaqësuesit e komunës së Sarajit lëre që asnjëherë nuk kanë shfaqur interes për të investuar në mirëmbajtjen e xhamisë, por bile as edhe një namaz nuk vijnë të bëjnë këtu.
Sapo afrohet koha e namazit të drekës arriti edhe imami i xhamisë, zotëri Orhan Salihu. Nuk kishte si të ndodh ndryshe pa mos i thënë dy tre fjalë për portalin tonë edhe hoxha i nderuar. Me aq sa është njoftuar hoxhë Orhani, kjo xhami duhet të jetë mos jo më e vjetra, por sigurt në mesin e 3-4 xhamive më të vjetra në Maqedoni, dhe gjithnjë e njohur nga më parë si tranzit-xhamia.
“Ju përgëzoj për kohën që ndatë ta vizitoni xhaminë tonë. Kjo xhami mesa di unë është ndër 3-4 xhamitë më të vjetra në Maqedoni. Në kohën e themelimit të xhamisë nuk ka pasur njerëz që kanë banuar në këtë vend, mirëpo është njohur si tranzit-xhami, ku tregtarët gjatë udhëtimeve të tyre janë ndalë për të falur namazin dhe për të pushuar në parkun e xhamisë”, njofton portalin tesheshi.com, hoxhë Orhan Salihu.
Në oborrin e kësaj xhamie mund të shihet edhe varri i hafëzit të ndjerrë Rifat Salihu, i cili 60 vite shërbeu si imam i kësaj xhamie, dhe ndërroi jetë në vitin 2009. /tesheshi.com/
