Nga Blendi Gashi
(Mos)rindërtimi i xhamisë në urën e Ibrit në Mitrovicën Veriore, konkretisht raportimet e fundit se në oborrin e xhamisë do të ndërtohet një fushë sporti, specifikisht tenisi, ka bërë që kjo çështje më në fund të marrë edhe vëmendjen e institucioneve të shtetit.
Çështja në fjalë tash e ca kohë ka irrituar qytetarët e Mitrovicës, të cilët kanë kërkuar përgjegjësi nga zyrtarët e lartë vendas, përfshirë edhe ministren e Dialogut, Edita Tahiri.
Më i zëshmi është analisti Nexhmedin Spahiu, njëherit qytetar nga Mitrovica, i cili alarmoi se në qytetin e tij po ndodh një skandal dhe se po tentohet të zhduket xhamia e Ibrit dhe në vend të saj, ku sipas tij parashihet ndërtimi i një fushe tenisi.
Por institucionet e shtetit, Bashkësia Islame e Kosovës dhe Komuna e Mitrovicës këmbëngulin se xhamia do të ndërtohet herët apo vonë.
Komuna e Mitrovicës Jugore që udhëhiqet nga Agim Bahtiri, thotë se në asnjë mënyrë nuk do të heqet dorë asnjëherë nga ndërtimi i xhamisë dhe se kanë bërë leje në Mitrovicën Veriore për rindërtimin e saj, për çka janë në pritje.
Kur dihet se Mitrovica Veriore udhëhiqet nga Goran Rakiq i Listës Serbe, atëherë konkludohet se fati i rindërtimit të xhamisë është në duar të serbëve dhe Serbisë.
“S’do të hiqet dorë asnjëherë nga rindërtimi i xhamisë”
Erseka Hasanaj, shefe e kabinetit të kryetarit Agim Bahtiri, thotë se vendi ku ka qenë xhamia, e cila patjetër duhet të rindërtohet, i takon komunë së re në veri të Mitrovicës, që administrohet nga serbët.
Hasanaj, thotë se kryetari Bahtiri, që nga ardhja e tij në krye të komunës, disa herë ka biseduar me përfaqësues të institucioneve të ndryshme vendore e ndërkombëtare dhe me ata të Bashkësisë Islame, për mundësinë e fillimi të rindërtimit të xhamisë në vendin ku ka qenë dhe nga ky synim nuk do të heq dorë asnjëherë.
“Se kur do të fillojë rindërtimi, kjo nuk varet fare nga kryetari Bahtiri e as nga komuna që ai e drejton, për arsyet që i përmendëm më lartë. Bashkësia Islame e Mitrovicës, ka bërë kërkesë në komunën Mitrovica e Veriut për lëshimin e lejes për rindërtimin e xhamisë dhe është në pritje ët saj. Ajo e ka mbështetjen e plotë të kryetarit Bahtiri. Në Bruksel, në kuadër të projektit për rivitalizimin e urës kryesore mbi lumin Ibër, është folur edhe për rindërtimin e xhamisë në vendin ku ka qenë, që sigurisht se do të ndodhë patjetër dhe për këtë arsye, hapësira që i takon xhamisë është e siguruar dhe nuk do të preket në asnjë mënyrë nga askush”, ka thënë Hasanaj, për tesheshi.com.
Ajo ka mohuar deklarimet e analistit Spahiu se në oborrin e xhamisë po ndërtohet fushë për tenis, por ka pranuar se afër xhamisë, por jo në oborrin e saj po ndërtohet një fushë e basketbollit.
“Aty afër në hapësirën publike pranë lumit, është duke u ndërtuar në fushë e vogël e basketbollit për qëllime rekreative të të rinjve, e cila siç ju thamë nuk e prek fare hapësirën e xhamisë. Në fund, edhe njëherë po ju themi se komuna e Mitrovicës Jugore (që tash me ligj quhet kështu), kryetari Bahtiri dhe të gjithë qytetarët e Mitrovicës do të kërkojnë me ngulm rindërtimin e xhamisë aty ku ka qenë dhe nga ky qëllim asnjëherë nuk do të heqin dorë”, thotë Hasanaj, për tesheshi.com.
“Deri në Strazburg për rindërtimin e xhamisë”
Edhe Bashkësia Islame e Kosovës (BIK) thotë se në asnjë mënyrë nuk do të heqin dorë nga rindërtimi i xhamisë, për çka shprehet i sigurt se xhamia do të rindërtohet.
Sekretari i përgjithshëm i BIK-ut, Resul Rexhepi, ka deklaruar për mediat kosovare se BIK do të bëj çmos që të rindërtohet xhamia.
“Në atë vend ka qenë xhamia dhe do të bëhet xhamia. Le të bëhet çkado aty, aty do të bëhet xhamia me emër të Zotit. Por, na kemi dashur që kjo xhami të bëhet duke na ofruar siguri për ndërtimin e saj, e jo me dërgu njerëz të cilëve mund t’u ndodh ndonjë e papritur. Sigurinë, duhet ta ofroj aktualisht KFOR-i, gjegjësish organet ndërkombëtare. Deri në Strazburg dhe përtej Strazburgut. Do të bëjmë çmos, nuk do të ndalemi, duke kërkuar që të na mundësohet rindërtimi i asaj xhamie”, ka thënë Rexhepi.
“Parcela e xhamisë është e mbrojtur”
Ministrja Edita Tahiri, e cila ka dhënë premtime për rindërtimin e xhamisë poashtu ka reaguar ndaj deklarimeve të Spahiut duke i quajtur ato paushalle, derisa këmbëngul se parcela e xhamisë është e mbrojtur.
“Po e them edhe një herë se, marrëveshja për Planin rivitalizues nuk e përfshinë truallin e xhamisë. Dhe për të ne kemi luftuar si delegacion i Kosovës në kohën kur është arrit marrëveshja, Pra, e kemi mbrojtur parcelën e xhamisë dhe unë kam takuar përfaqësuesin e komunitetit mysliman të Mitrovicës së bashku me kryetarin e Mitrovicë, ku i kam siguruar për marrëveshjen, duke ia bërë të qartë se parcela e xhamisë është e mbrojtur dhe nuk përfshihet rivitalizim”, thotë ajo.
Tahiri ka thënë se nuk e ka parë të arsyeshme ngritjen e kësaj çështje në Bruksel, pasi sipas saj, me kohë kur është diskutuar për këtë temë është bërë edhe mbrojtja e pronës së xhamisë.
Ndryshe, xhamia e Ibrit ishte më e vjetra në Mitrovicë, që u dogj dhe u rrënua nga forcat serbe në prill të vitit 1999. /tesheshi.com/
