Fatmir Xhafaj, ministër i Brendshëm në qeverinë “Rama2”, i ka dhënë përgjigje akuzave të opozitës mbi lidhjet e tij me krimin dhe ndaj vëllait që duhet arrestuar dhe i duhet dorëzuar Interpolit.
“E çmoj me vend që në këtë seancë të parë të bëj një reagim publik për disa akuza të vjetra. Punët e shumta që më presin për forcimin e rendit dhe sigurisë, nuk do të mundësojnë të kthej përgjigje për çështje të sajuara, jam i bindur se pjesa e shëndoshë e politikës opinionit nuk kanë nevojë për këtë shpjegim.
Ndaj, kjo është hera e fundit dhe detyrim ndaj çdo opozitari për të parë të vërtetën, ashtu si është. Ky është sulm i egër personal në një histori filluar 15 vjet më parë.
Në 2002 kur isha ministër dhe ju opozitë e ngritët këtë akuzë dhe jam përgjigjur. Në 2010 kur ishit në pushtet, kryeministër dhe ministër i Brendshëm më sulmuat si opozitar me të njëjtin avaz vëllai dhe e shkuara e tij, unë si opozitar u përgjigja nga kjo foltore akuzës si pushtetar, lexojeni aty e keni.
Prej 8 vjetësh ishit në pushtet i kishit mundësitë të provonit akuza dhe ndëshkonit me policinë, prokurorinë dhe gjykatën, nuk besoj se i falët familjarët e mi, mua jo e jo.
Vjet në kulmin e Reformës në Drejtësi, iu kthyet avazit, ju vazhduat avazin dhe unë reformën, rezultati dihet.
Sivjet në mars kur u bëra ministër i Brendshëm thatë çfarë nuk ju nxori goja e ligë. Nga maji ju opozitarët u bëtë pushtetarë në Ministrinë e Drejtësisë dhe Ministrinë e Brendshme, ministra që u emëruan nga kryetari juaj, kishit dy ministritë ku janë faktet dhe provat nëse ka të tilla, çfarë bëtë ju, si nuk gërrmuat ti zbulonit, ku kishte rast më të mirë se të më kryqëzonit?
Jo vetëm kryetari juaj, por askush tjetër i veshur me mandat nuk më vendos mua në këtë akuzë për çfarë i ka ndodhur apo mund t’i ndodhë një pjesëtari të familjes sime, cilido që mund të ketë shkelje ligji është madhor ka përgjegjësinë ta vuaje atë vetë përmes ligjit.
Nëse edhe për një moment do të ishte e vërtetë , unë ju pyes ku është përgjegjësia ime njerëzore e politike, se për ligjore as mund të bëhet fjalë. Jam në politikë prej 20 vjetësh dhe jam gati të përgjigjem për çfarë sillem me Kushtetutën dhe ligjin, unë nuk kam ndërmend të bëjë replika për avazin tuaj, ndaj kjo është hera e fundit”, tha Xhafaj. /tesheshi.com/
