Ministri i Punëve të Brendshme, Fatmir Xhafaj, ka reaguar për herë të parë mbi ngjarjen e ndodhur në Elbasan, ku një automjet i policisë, ndërsa ishte në aksion, u godit nga një mjet i dyshuar si i blinduar, që më pas i iku uniformave blu, duke u futur në tregun e qytetit.
Ministri i Brendshëm nuk e mohoi faktin që brenda policisë së Shtetit ka edhe struktura me individë të paaftë dhe të lidhur me krimin në ndonjë rast, ndaj edhe ka urdhëruar analizën e hollësishme për të nxjerrë në pah të gjithë përgjegjësit.
Duke mos shmangur përgjegjësinë dhe problematikat e policisë në mënyrën e reagimit ndaj një incidenti që tashmë është nën hetim, Xhafaj tha se ngjarjet e fundit në Elbasan e kanë origjinën nga ngjarje kriminale që nga vitit 2005 e deri më tani.
Ai dha sqarime para Kuvendit duke thënë se ka urdhëruar zhvillimin e një analize të detajuar që të zbulojë të vërtetën e incidentit në qytetin e Elbasanit, ku një makinë e blinduar goditi automjetin e zv.drejtorit të Policisë së Elbasanit, dhe u fut në Tregun Agro-Ushqimor, porta e të cilit u hap menjëherë me pul nga roja i ambientit.
Të vetmit që nuk u futën brenda, ishin efektivët, dhe për këtë ministri Xhafaj tha se ka urdhëruar Shërbimin e Kontrollit të Brendshëm dhe Drejtorinë e Standardeve që të analizojnë veprimet e policëve, pavarësisht detyrës që kanë.
“Ngjarjet e fundit që lidhen me rendin dhe sigurinë publike të ndodhura në Elbasan, më obligojnë mua si ministër i Brendshëm të informoj për sa vijon.
Faktet kriminale janë të lidhura me ngjarje kriminale, vrasje apo tentativa vrasjesh që datojnë nga 2005, 2006, 2009, 2011 dhe 2016. Disa prej këtyre ngjarjeve kanë ndodhur jashtë. Për disa ka autorë të dënuar dhe të identifikuar. Por ka edhe shtetas që janë marrë, si fajtor por janë liruar nga akuzat nga sistemi i kalbur i drejtësisë.
Pa dashur të kaloj përgjegjësinë, dua të konfirmoj se qasja jo profesionale dhe jo sipas ligjit kundrejt këtyre ngjarjeve ka ndihmuar në vite në inkurajimin e veprimit kriminal nga këta kriminelë. Ngjarjet e fundit e Elbasanit janë rrjedhojë e veprimit në rritje të policisë së shtetit kundër veprimtarive kriminele.
Kam urdhëruar analizën e plotë të situatës në këtë qytet. Kam urdhëruar drejtuesit kryesor të hetimit në Policinë e Shtetit të instalohen në Elbasan. Kam kërkuar një analizë të plotë që të nxjerr në pah shkaqet e vërteta të këtyre ngjarjeve kriminale të këtyre dy grupeve kriminale Çelajt dhe Çapjat
I kam kërkuar Shërbimit të Kontrollit të Brendshëm dhe Drejtorisë së Standardeve që të analizojnë veprimet dhe mosveprimet e policisë. Kam kontaktuar personalisht drejtuesit e lartë të prokurorisë, dhe u kam dhënë atyre mbështetjen tim maksimale dhe mbështetjen e Policisë së Shtetit, në funksion të zbardhjen së ngjarjes, dhe jo vetme të kësaj ngjarje. Në dijeninë time, prokuroria, aktualisht është duke zhvilluar hetime intensive të përbashkëta me Policinë e Shtetit, dhe është rasti që ajo të dëshmojë që është në lartësinë e detyrës.
Problemet e policisë në Elbasan do jete pjesë e një analize të qartë për problemet aty. Nuk shfajësoj veprimet e mia apo gabimet e mia që mund të kemi. Reagimi ndaj veprimeve të policisë do jetë edhe më i madh. Ndaj ju kërkoj që ta mbështesni Policinë, pasi në pjesën më të madhe të saj është përbërë nga individë të ndershëm.
Për këtë kërkoj mirëkuptim nga publiku. Pres edhe kritika. Pavarësisht se i konsideroj prematurë disa komente në media, por ne ndjekim me vëmendje gjithçka. Duhet të kuptojmë se si prokuroria që është organ përgjegjësi i hetimit dhe policia, që s’kanë thënë anën e vet të ngjarjes, por duhet thënë se ato nuk duhet të kenë të njëjtën pikë vështrimi që kanë, pavarësisht statusit. Krimi është i lidhur me fije të dukshme dhe të padukshme”, tha Xhafaj. /tesheshi.com/
