Sabotimi i gazsjellësit rus Nord Stream në 2022-shin në Detin Baltik u miratua nga niveli më i lartë në Kiev, duke përfshirë në radhë të parë presidentin Volodymyr Zelensky, raportoi të enjten Wall Street Journal.
Sipas gazetës amerikane, e cila bazohet në burime ushtarake ukrainase, sulmi me eksploziv në det është kryer nën mbikëqyrjen e komandantit të përgjithshëm të ushtrisë ukrainase në atë kohë, Valery Zaluzhny, pavarësisht se Zelensky ndërroi mendje në ndërkohë dhe kërkoi që plani të pezullohej, raporton AFP.
Raporti u publikua një ditë pasi u publikuan rezultatet e një hetimi gjerman për incidentin, i cili tregonte për Ukrainën, dhe pasi një urdhër arresti u lëshua së fundmi për një zhytës profesionist nga ai vend.
Ideja e sabotimit u shfaq në maj 2022 në një takim të oficerëve të lartë dhe drejtuesve të bizneseve ukrainase, tre muaj pas fillimit të pushtimit rus të Ukrainës, sipas WSJ.
Sipas gazetës, gjashtë persona janë përfshirë drejtpërdrejt në operacionin, i cili kushtoi pothuajse 300 mijë dollarë amerikanë, i cili u financua tërësisht nga paratë private.
“Presidenti ukrainas Volodymyr Zelensky fillimisht e miratoi planin, sipas një zyrtari që ishte i pranishëm në atë takim dhe tre personave që dinin për të”, raportoi WSJ.
“Megjithatë, më vonë, kur CIA e mori vesh dhe kërkoi ta ndalonte, ai urdhëroi që të ndalohej”, shtoi gazeta.
Sidoqoftë, Valery Zaluzhny e injoroi atë komandë dhe ekipi i tij ndryshoi planin fillestar, sipas WSJ.
Zaluzhny, i cili që atëherë është bërë ambasador i Ukrainës në Londër, tha në një përgjigje me shkrim për WSJ se ai nuk dinte asgjë për një operacion të tillë dhe i quajti të gjitha pretendimet një “provokim”.
Pas sabotimit të Rrjedhës së Veriut në shtator 2022, Zelensky kërkoi një shpjegim nga Zaluzhny, sipas gazetës, e cila citoi tre persona të njohur me këtë çështje.
Ai u përgjigj se ishte tepër vonë, duke pretenduar se nuk mund të komunikonte më me diversantët sepse çdo kontakt mund të rrezikonte operacionin.
Mediat gjermane janë shumë më të kujdesshme kur bëhet fjalë për përfshirjen e autoriteteve ukrainase dhe tentojnë të mos fajësojnë Zelensky-n të paktën. E përditshmja Der Spiegel përmend nga ana tjetër përfshirjen e mundshme të Valery Zaluzhny-t. /tesheshi.com/
