Caroline Wozniacki fiton turneun e Australisë në tenis. Danezja ka triumfuar në finale ndaj numrit 1 në botë, Simona Halep, duke ngritur për herë të parë në karrierë kupën e një Grand Slami.
Në një lojë të ekuilibruar e me nerva të tendosura, Wozniacki arriti të fitojë me tie break setin e parë, 7-6. Në të dytin është Halep që sulmon më tepër, duke thyer disa herë shërbimet e kundërshtares, e duke e mbyllur setin me rezultatin 6-3.
Në setin final, sërish diferencat mes dy tenisteve ishin minimale, por danezja shfaqi më shumë grintë, duke arritur ta fitojë atë 6-4 dhe të gjithë ndeshjen me rezultatin 2-1.
Përveç fitimit të titullit, Wozniacki i merr rumunes Halep edhe vendin e parë në renditjen botërore të tenisit për femra. Danezja rikthehet në këtë mënyrë në catinë e botës, ku ka qëndruar edhe dy herë të tjera më parë. /tesheshe.com/
