Nga maji, operatori i linjës ajrore me kosto të ulët(Low cost) Wizz Air do të ketë një model abonimi në ofertën e tij – pasagjerët do të mund të paguajnë një shumë të përgjithshme për një periudhë prej gjashtë muajsh, dhe në këmbim ata do të mund të zgjedhin një fluturim çdo muaj vajtje-ardhje.
Modeli i abonimit të Wizz Air-it i quajtur MultiPass aktualisht do të jetë i mundur vetëm në fluturimet në linjat e brendshme në Itali dhe linjat ndërkombëtare për në Poloni, ku pasagjerët do të kenë katër opsione në dispozicion – të zgjedhin një abonim që përfshin vetëm biletën, më pas modelin e biletës plus përparësinë e imbarkimit, një biletë dhe një valixhe deri në 20 kilogramë ose një model që përfshin të gjitha opsionet.
Siç shkruan portali Travelpuls, ata që vendosin të abonohen mund të blejnë menjëherë biletën e parë, ku fluturimi është të paktën pesë ditë nga dita e blerjes. Abonimi duhet të zgjasë të paktën gjashtë muaj dhe rinovohet çdo muaj.
“Për një çmim fiks, udhëtarët marrin një ofertë të shkëlqyer për sezonin e pritshëm veror dhe në të njëjtën kohë ata nuk kanë nevojë të monitorojnë çmimet dhe të planifikojnë udhëtimin e tyre shumë më herët për të marrë ofertën më të mirë.
Falë abonimit, pasagjerët mund të zgjedhin shumë lehtë një fluturim për qëllime biznesi apo argëtimi”, thuhet në një deklaratë të kompanisë. /tesheshi.com/
