Një dokument i publikuar nga “Wikileaks” paraqet një shkresë diplomatike të ish ambasadorit amerikan në Maqedoni, Filip Riker, në një realcion Shkup-Uashington. Kjo shkresë ka të bëjë me takimin që Riker ka patur me kryeministrin Gruevski, ku kanë biseduar për “Rastet e Hagës”.
Kujtojmë se tribunali hodhi poshtë akuzat ndaj UÇK-së që u riaktualizuan me bombën e fundit të Zaevit, pasi siç tha ky i fundit, të ashtuquajturat raste të Hagës, janë mbyllur me marrëveshjen politike Ahmeti-Gruevski, dhe pa epilog gjyqësor.
Dokumenti në fjalë informon për takimin Riker –Gruevski dhe mban datën 21 shtator 2008.
“Gruevski tha se kupton rëndësinë që ka kjo çështje për partnerin e tij të koalicionit, BDI-në. Ai është shprehur se do ta takojë Ahmetin për të biseduar për këtë temë. Gruevski shtoi se prokurori shtetëror publik i ka thënë atij se ligji për Amnisti nga viti 2002 nuk ka të bëjë me këto raste, siç pretendon Ahmeti dhe se do të vazhdojë me tre nga katër rastet e paraqitura”,- thuhet në tabulatet e Wikileaks.
(Gruevski informoi se prokurori i ka thënë nuk posedon prova të mjaftueshme për të vazhduar një procedurë gjyqësore për të ashtuquajturën lëndë “Udhëheqësja e UÇK-së”)
Në bisedë, Gruevski ka thënë se është në pozitë të vështirë politike, ndërsa nuk do të paraqesë pengesë për të, nëse prokurori ose gjykatat vendosin se ligji për amnisti vërtetë ka të bëjë me rastet në fjalë dhe ato të hedhen poshtë, por theksoi se nuk mund të mbajë anë.
Në dokumentin e “Wikileaks” shkruhet se Gruevski është i shqetësuar pasi partitë kryesore shqiptare PDSH dhe BDI së shpejti mund të kërkojnë që parlamenti të marrë qëndrim për këtë çështje.
“Edhe pse e kupton rastin se marrëveshja me partnerin e tij të koalicionit mund të vihet në pikëpyetje, ai ka thënë se nuk mund ta kritikojë procesin e rasteve gjyqësore dhe pastaj të ballafaqohet me maqedonasit sepse Haga më herët kishte dënuar zyrtarin policorë Johan Tarçuloski për krime lufte”,- thuhet në shkresën e zbardhur të “Wikileaks”.
