Gjenerali i pensionuar amerikan, Wesley Clark, njeriu që udhëhoqi fushatën e bombardimeve të NATO-s ndaj Serbisë e cila solli çlirimin e Kosovës, në një konferencë të mbajtur në Prishtinë u shpreh se prioritetet e institucioneve kosovare do të duhej të ishin zhvillimi ekonomik dhe krijimi i perspektivës për të rinjtë, e jo bërja e ushtrisë.
“Kemi ende KFOR-in këtu për të ofruar siguri. Po të isha në Kosovë dhe të llogarisja në mbrojtjen e KFOR-it dhe NATO-s, unë më shumë do të kisha dëshirë që resurset e qeverisë të shpenzohen për zhvillim paqësor ekonomik sesa në forcë ushtarake. Unë besoj që rregulli bazë në ushtri është që duhet të kesh personel ushtarak për të siguruar vendin dhe asgjë më shumë”, u shpreh Clark.
Duke folur rreth qëndrimit të KFOR-it në Kosovë, gjenerali Clark theksoi se nuk është koha e duhur që trupat e KFOR-it të largohen, ndërsa tha se dëshiron që Kosovën ta shohë në OKB.
“Mendoj që do të vijë koha për KFOR-in që të largohet. Por, mendimi im personal është se kjo nuk është koha e duhur që KFOR-i të largohet. Ajo që unë dua ta shoh është arritja e një marrëveshjeje midis Serbisë dhe Kosovës e cila do t’i normalizonte marrëdhëniet mes tyre. Le ta ketë Kosova ulësen e saj në Kombet e Bashkuara dhe eventualisht, bashkë me Serbinë, të dyja të bëhen anëtare të Bashkimit Evropian. Nuk ka arsye pse dy shtete nuk mund të jenë fqinjë të mirë”, tha gjenerali Clark.
Kujtojmë se Clark udhëhoqi forcat e NATO-s drejt fitores në një fushatë 78-ditore kundër regjimit të Sllobodan Millosheviçit dhe shpëtoi 1.5 milionë shqiptarë të Kosovës nga spastrimi etnik. /tesheshi.com/
