Ndërsa çdo ditë qindra mercenarë të tij vdisnin në frontin e Bakhmutit, kreu i Grupit Wagner, Yevgeny Prigozhin, i dërgoi Ukrainës një ofertë të jashtëzakonshme.
Prigozhin tha se nëse komandantët ukrainas tërheqin ushtarët e tyre nga zona rreth Bakhmutit ku janë forcat e tij, ata do t’i japin Kievit informacione për pozicionet e trupave ruse, të cilat Ukraina mund t’i përdorë për t’i sulmuar ata.
Prigozhin ua bëri këtë propozim kontakteve të tij në shërbimin e inteligjencës ushtarake ukrainase GUR, me të cilin ai mbajti komunikim sekret gjatë luftës, sipas dokumenteve të inteligjencës amerikane të zbuluara përmes platformës Discord.
Washington Post kujton se si Prigozhin u grind publikisht me komandantët ushtarakë rusë, të cilët ai me furi pretendon edhe sot e kësaj dite se ata nuk arritën të pajisnin dhe furnizonin forcat e tij dhe se nuk dinë asgjë për taktikat ushtarake.
Një ofertë e tillë nga Prigozhin është një tradhti e rëndë ndaj Kremlinit. Kjo nuk është e çuditshme për shumicën e analistëve ushtarakë, sepse kohët e fundit Prigozhin ka qenë në marrëdhënie të këqija me presidentin rus Vladimir Putin.
Dokumenti i zbuluar nuk sqaron se cilat pozicione të trupave ruse Prigozhin donte t’u zbulonte ukrainasve.
Dy zyrtarë ukrainas konfirmuan për The Washington Post se Prigozhin kishte folur disa herë me agjencinë e inteligjencës të Ukrainës, të njohur si GUR. Një zyrtar tha se Prigozhin bëri një ofertë për Bahmutin disa herë, por se Kievi refuzoi sepse ata nuk i besojnë Prigozhin dhe mendojnë se propozimet e tij mund të jenë një kurth.
Zyrtari amerikan paralajmëroi gjithashtu se në Uashington ka dyshime të ngjashme për qëllimet e Prigozhin.
Presidenti ukrainas Volodymyr Zelensky nuk donte të konfirmonte kontaktet me Prigozhin. “Kjo është një çështje e inteligjencës ushtarake,” tha ai në atë kohë. Ai gjithashtu kundërshtoi publikimin e informacionit të klasifikuar dhe tha se besonte se rrjedhja i kishte përfituar Rusisë. /tesheshi.com/
