Kriza e ardhshme në Europë mund të ndodhë në rajonin e Ballkanit. Kështu shkruan Wall Street Journal, duke parashikuar krizën që mund të ndodhë nën ndikimin e Rusisë dhe Turqisë.
Gazeta amerikane shkruan se nëse arrihet deri te kjo krizë, Bashkimi Evropian mund të jetë i tronditur nga themelet e saj.
Duke shtjelluar më tej këtë tezë, Wall Street Journal, shkruan se “Rusia dhe Turqia mund të inkurajojnë përfaqësuesit e tyre në Ballkan, Serbi dhe Shqipëri, për t’u ndihmuar me rindarjen e kufijve rajonale.”
Gazeta thotë se Rusia dhe Turqia konsiderohen “lojtarë kyç” në këtë pjesë të Evropës dhe “shkaktarët kryesorë të krizave të mundshme”.
Duke mos u mbështetur në ndonjë burim ose ekspert relevant, “Wall Street Journal”, shkruan se Qeveria serbe me mbështetjen e Rusisë do të mund të “aneksojë pjesë të Bosnjes të banuara me serbë”, dhe se Turqia do të mund të ndihmojë në aneksimin e Kosovës nga ana e Shqipërisë, në të njejtën mënyrë që Serbia mund të bëjë këtë në Bosnje.
Megjithatë, gazeta e pranon që një skenar i tillë është pothuajse i pamundur të ndodhë, për shkak se “do të jetë e vështirë për këto dy vende të bien dakord mbi kufijtë e rinj.”
“Wall Street Journal” paralajmëron se Perëndimi duhet të jetë i shqetësuar rreth ndikimit turk në Ballkan, duke pasur parasysh se Turqia është duke bashkëpunuar përherë e më shumë me Rusinë, edhe pse në “letër” ajo është anëtare e NATO-s”.
“Secili vend i Ballkanit do të preferonte më tepër të jetë pjesë e BE-së sesa aleat i Rusisë apo Turqisë”, shkruan gazeta amerikane. /tesheshi.com/
