Pas afrimit të sulmuesit Cenk Tosun nga Beshiktashi, Evertoni i drejtuar nga Sam Allardyce ka bërë blerjen e dytë gjatë fushatës së transferimeve të janarit.
Shtypi britanik njofton se Evertoni sapo ka nënshkruar me Theo Walcott-in; një marrëveshje për më shumë se 20 milionë paundë, për një kontratë për tre vite e gjysmë.
Walcott i dha fund qëndrimit 12-vjeçar te Arsenali pa mundur kurrë të bëhej pjesë e palëvizshme e formacionit të parë.
Ai u aktivizua në 397 takime me Arsenalin që nga viti 2006, duke shënuar 108 gola. Arsene Wenger e ka pranuar se nuk e dëshironte largimin e Walcott-it, por nuk mund t’i siguronte atij një aktivizim të vazhdueshëm.
Një lojtar i kombëtares angleze, Theo Walcott ka luajtur në 47 takime. Miqësorja ndaj Spanjës në nëntor të 2016-s ka qenë ndeshja e fundit ku ai ka veshur bluzën e përfaqësueses.
Arsenali pritet të humbasë gjatë këtyre ditëve dhe Alexis Sanchez-in, ndërsa ka treguar interes për sulmuesin e Borusias së Dortmundit, Pierre-Emerick Aubameyang. /tesheshi.com/
