Wadi Qana, e vendosur midis Selfite dhe Kalkiya në Bregun Perëndimor të pushtuar, vazhdon të “luftojë për ekzistencë” si tokë palestineze në mes të vendbanimeve hebraike.
Kifah Zejdan, një nga vendasit, tha se Izraeli ua vështirëson jetën banorëve të zonës, të cilën ata e quajnë “pjesë parajse”, për shkak të bukurive natyrore.
Ai tha se Izraeli po bën gjithçka për t’i larguar ata nga zona dhe se vendbanimet hebraike po zgjerohen gradualisht drejt luginës, raporton Anadolia.
Zejdan vuri në dukje se Izraeli shkatërroi pyjet dhe bimësinë në zonë duke ndërtuar struktura betoni të armuar, ndërsa në të njëjtën kohë ata nuk u lejuan të afroheshin me vendbanimet hebraike.
Bregu Perëndimor i pushtuar, i ndarë në tre zona
“Ne kemi lindur këtu. Ne do ta mbrojmë këtë tokë, si babai dhe gjyshi im, nuk do ta lëmë këtë vend”, tha Zejdani.
Zejdan, i cili jeton në një shtëpi të improvizuar dhe ka 350 dele, tha se izraelitët ua shkatërruan shtëpitë disa herë.
Vetëm dhjetë familje palestineze jetojnë pranë shtëpisë së Zejdanit; merren me blegtori, kultivojnë ullinj dhe agrume.
Ka dhjetë burime uji të përshtatshme për ujitje dhe pije në zonën e Wadi Qan, ku ka disa male me një luginë në mes.
Palestinezëve nuk u jepet leje ndërtimi në Wadi Qana, në zonën “C” të Bregut Perëndimor.
Në vitin 1995, delegacionet palestineze dhe izraelite nënshkruan Marrëveshjen e Dytë të Oslos, sipas së cilës Bregu Perëndimor i pushtuar ndahej në tre zona.
“Ne kemi lindur këtu, edhe paraardhësit tanë kanë qenë këtu”
Zona “A” mbulon 18 për qind të territorit të Bregut Perëndimor dhe autoriteti administrativ dhe i sigurisë mbahet nga palestinezët.
Zona “B” përbën 21 për qind të Bregut Perëndimor dhe ndan përgjegjësitë administrative dhe të sigurisë.
Zona e tretë dhe më e madhe “C” mbulon 61 për qind të Bregut Perëndimor dhe është plotësisht nën kontrollin e Izraelit.
Nassar Mansur zotëron dhjetë hektarë tokë të mbjellë me agrume në shpatet e luginës.
Ai theksoi se nuk do të heqë dorë nga vendi i tij.
“Ne kemi lindur këtu, edhe paraardhësit tanë kanë qenë këtu. Ne nuk do të largohemi nga këtu pavarësisht se çfarë bëjnë pushtuesit”, tha Mansur.
Ai vuri në dukje se administrata izraelite e përdori zonën për projektet e vendbanimeve hebreje dhe u përpoq të kontrollonte tokat bujqësore.
Një “rezervat natyror” për ndërtimin e vendbanimeve hebraike
Sipas Nafiz Mansur, kryetar i Shoqatës për Mbrojtjen e Zonës, rajoni është i pasur si me turizëm ashtu edhe me bujqësi me bukuri natyrore.
Mansur theksoi se në vitin 1983 autoritetet izraelite e kthyen zonën në një “rezervat natyror” me qëllim ndërtimin e vendbanimeve hebraike.
“Lugina ishte plot me njerëz dhe ishte një burim ushqimi për rajonin. Perimet, frutat dhe agrumet rriteshin në luginë dhe kishte zona të mëdha për kullota”, shpjegoi Mansur. /tesheshi.com/
