Vetëvendosje ka përmbysur një tjetwr kamion me prodhime të Serbisë në Rrugën e Kombit. Këtë ajo ka bërë të ditur përmes një postimi në Facebook, ku ka shkruar se hegjemonia e Serbisë në Kosovë është e papranueshme, qoftë ajo politike, ushtarake, apo ekonomike.
“E vetmja e ardhme për të cilën do të punojmë e do të angazhohemi, është ajo e paqes me drejtësi e barazi mes vendeve. Është e papranueshme për ne që Serbia vazhdon të mos e njohë Kosovën, si dhe të fshehë apo të mohojë krimet gjenocidale që ka bërë këtu, në vend që të kërkojë falje e të dëmshpërblejë viktimat. Kjo Serbi që punon aktivisht kundër Kosovës, nuk mund t’i ketë dyert e hapura për prodhimet e saj. Për të patur reciprocitet tregtar është i domosdoshëm në radhë të parë reciprociteti politik”, thuhet në njoftim.
VV bën me dije se gjatë këtij aksioni, si dhe gjatë çdo aksioni tjetër të mëparshëm, aktivistët janë kujdesur në maksimum që drejtuesi i mjetit dhe asnjë pasagjer të mos lëndohen fizikisht e të mos frikësohen, duke thënë se nuk kanë asgjë kundër qytetarëve të cilësdo etni, apo të cilitdo vend.
Vetëvendosje më tej thotë se aksione të tilla do të vazhdojnë deri sa qeveria e Serbisë të ndryshojë qëndrim ndaj Kosovës, dhe “të mos na i mohojnë të drejtat tona kombëtare.” /tesheshi.com/
