Drejtuesit e Lëvizjes Vetëvendosje kanë mbajtur një konferencë të jashtëzakonshme për media me ç’rast kanë thënë se gjatë ditës së djeshme fitoi opozita, e cila detyroi pushtetin të fshihet skutave.
Kryetari i VV-së, Visar Ymeri është zotuar se opozita do të vazhdojë me protesta kundër Zajednicës, duke thënë se qeveria e koalicionit PDK-LDK, ka dështuar të shfuqizojë marrëveshjen për Asociacionin e Komunave me shumicë serbe.
“Mbrëmë për nëntë orw rresht ka zgjatur protesta brenda dhe jashtë Kuvendit, ku fitoi opozita e bashkuar. Strukturat paralele të PDK-LDK dështuan ta shfuqizojnë Zajednicën. Takimi i mbajtur në restaurant duke e lënë mënjanë 1/3 e deputetëve paraqet shkelje të demokracisë. Protesta jonë është e drejtuar në mbrojtje të shtetit nga rrënimi i qeverisë. Protesta jonë do të vazhdojë edhe në të ardhmenn dhe do t’i detyrojmë të fshihen skutave. Kosova nuk e pranon Zajednicën sikurse nuk i duron veglat e saj në qeveri Mustafen e Thaçin”, ka thënë Ymeri.
Kurse, deputeti Albin Kurti tha se duke qenë të bashkuar, të vendosur dhe aktiv nuk kanë lejuar normalizimin e Zajednicës në Kuvendin e Republikës.
“Në Kosovë nuk mund të ndërtohet edhe Republika edhe “Zajednica”. Prandaj “Zajednica” do të bjerë ose bashkë me të do të bije edhe qeveria. Nuk ka zgjidhje tjetër. Ata kanë pritur që ne do të lodhemi, ata kanë pritur që ne do të mërzitemi, por asnjë nga këto nuk ka ndodhur. As në rrugët e Prishtinës dhe as në sallën e Kuvendit. Rezultat i qëndrueshmërisë sonë të pakompromis është edhe fitorja e mbërmshme”, ka deklaruar Kurti.
/tesheshi.com/
