Lëvizja ‘Vetëvendosje’ ka zhvilluar një tubim me qytetarë të Tiranës në një sallë, siç thotë VV, të mbushur mbi kapacitetin, në Muzeun Kombëtar në Tiranë.
Kjo Lëvizje thotë se në takim morën pjesë shumë qytetarë, intelektualë, publicistë, artistë, veprimtarë, gazetarë dhe studentë të Tiranës të cilët pritën me duartrokitje mbërritjen në sallë kryetarin Visar Ymeri si dhe të deputetët Glauk Konjufca e Albin Kurti.
Në njofti thuhet se Visar Ymeri u ndal në zbërthimin teknik të asaj që përfaqëson “Zajednica” e Komunave me shumicë serbe në Kosovë si dhe pasojat që do të vuajë Kosova nga zbatimi i saj.
Ndërkaq, Glauk Konjufca bëri një shpjegim të avancimit të projektit antishqiptar të Serbisë në Kosovë përmes frymëzimit, mbështetjes dhe fuqizimit të tyre përgjatë viteve të fundit.
Ish-kryetari i VV-së Albin Kurti, foli për nevojën që shqiptarët kudo ndodhen në Ballkan të ndërgjegjësohen për sfidat dhe rreziqet që ofron e ardhmja në dritën e orekseve grabitqare të afishuara nga fqinjët.
Ai, bëri thirrje që shqiptarët kudo ndodhen të jenë të përgatitur, të fuqizojnë ekonomitë dhe shtetet e tyre me ç’rast tha se përpjekja e VV-së për ndaljen e projektit të “Zajednicës” dhe demarkacionit kufitar me Malin e Zi shkon pikërisht në këtë drejtim.
“Me anë të protestave dhe aksionit të fundit politik të Vetëvendosjes në Kosovë, i është dhënë një goditje jo Qeverisë së Kosovës, por Serbisë dhe planeve të saj në Kosovë”, citohet të ketë thënë Kurti. /tesheshi.com/
