Lëvizja Vetëvendosje në një konferencë për media të mbajtur sot, ka akuzuar LDK-në e PDK-në për shpronësim të qindra hektarëve në Prishtinë, nga të cilat kanë përfituar shuma milionëshe.
“Kemi dëshmi dhe dyshime të bazuara se për 15 vite në Prishtinë janë shpronësuar me qindra hektarë tokë në vlerë qindra milionëshe nga të cilat ka përfituar një kastë e organizuar kriminale e shtrirë në institucionet komunale, në institucionet politike, në gjyqësi dhe në strukturat paralele të Serbisë, të cilat në një formë të bashkëpunimit konkret kanë mundësuar që prona komunale e Prishtinës të kalojë në pronësi private jashtëligjshëm me dokumente të falsifikuara, me korrupsion, me imponim të vullnetit dhe me mbyllje të syve të institucioneve që do të duhej të ishin bartës të luftimit të këtyre dukurive”, – ka thënë Ylli Hoxha nga radhët e VV-së.
Ai wshtw shprehur se, njerëzit e politikës që kanë mandat t’i ndalonin këto, njerëzit e gjyqësisë, njerëzit e komunës, në fakt mundësuan që ky rrjet i organizuar në subjektet politike të LDK-së dhe të PDK-së, ta shpronësojë Prishtinën dhe më tutje tërë Kosovën në shuma marramendëse qindra milionëshe.
Sipas Hoxhës vetëm në zonën e Sofalisë janë tjetërsuar mbi 60 hektarë tokë.
“Në zonën e Sofalisë, kemi dyshime se janë tjetërsuar mbi 60 hektarë të pronës komunale. Më 30 prill bëhen dy vite që kur grupi ynë i asamblistëve në bashkëpunim me Komunën e Prishtinës, kanë ngritur një kallëzim penal për një rast identik me rastin që e ngriti prokuroria ndaj Azem Sylës”, ka thënë Hoxha. /tesheshi.com/
