Gjykata e Posaçme e Apelit ka dënuar me dy vjet burg Fredi Belerin, duke lënë në fuqi vendimin e shkallës së parë.
Vendimi u dha nga gjyqtarët Daniela Shirka, Ilirjana Olldashi dhe Dhimiter Lara.
Beleri kërkoi pafajësi ose në rast të kundërt aplikimin e nenit 59 të kodit penal, që parashikon pezullimin e dënimit në burg dhe vuajtjen e pjesës së mbetur të dënimit me shërbim prove.
SPAK nga ana e vet kërkoi lënien në fuqi të vendimit të shkallës së parë që e dënoi Belerin me dy vite burg për korrupsion ne zgjedhje.
Kryebashkiaku i zgjedhur i Himarës ndodhet pas hekurave në burg që prej 12 majit të 2023.
Ai fitoi mandatin e deputetit në Parlamentin Evropian si përfaqësues i partisë udhëheqëse në Greqi, Demokracia e Re, në zgjedhjet e qershorit.
Me vendimin e sotëm të Apelit, që është i formës së prerë, ai do të qëndrojë në burg deri në tetor dhe nuk do të mund të shkojë në Strasburg në korrik për të bërë betimin si eurodeputet.
