Kryetari i Kuvendit të Maqedonisë së Veriut, Talat Xhaferi, ka njoftuar dorëheqjen e kryeministrit Zoran Zaev, pas një kërkese të këtij të fundit një ditë më parë.
Xhaferi u ka sqaruar deputetëve se me dorëheqjen e kryeministrit përfundon mandati i gjithë qeverisë, por teknikisht po vazhdon të punohet deri në zgjedhjen e një të reje.
Kryeministri Zaev nuk mori pjesë në seancë dhe në shpjegimin e dorëheqjes së tij, të cilën e dorëzoi dje në Kuvend, sqaroi se vendimin e ka marrë si një hap logjik nga rezultati i zgjedhjeve lokale dhe si shprehje përgjegjësie për rezultate (të këqija) të zgjedhjeve. Sipas tij, rezultatet e zgjedhjeve të fundit të mbajtura në tetor, “ndonëse ishin lokale, kanë një moment politik në të cilin ndodhet vendi, peshë kombëtare dhe politike”.
“Në kushte të tilla, për mua personalisht dhe si kryeministër, për shkak të politikave në të cilat besoj, për shkak të vlerave demokratike dhe evropiane që besoj, do të ishte politikisht e papërgjegjshme dhe e pajustifikuar të vazhdoja të drejtoja qeverinë.” Zaev dha dorëheqjen.
Ai theksoi se beson se kryeministri i dytë nga radhët e LSDM-së do të mund ta arrijë këtë në mënyrë më të mirë dhe me sukses për qytetarët dhe shtetin.
Shumica, rreth LSDM-së dhe BDI-së, e cila ka 64 anëtarë në parlament me 120 vende, tani do t’i kërkojë presidentit të Maqedonisë së Veriut, Steve Pendarovski, një mandat të ri për të formuar qeverinë. Siç ka paralajmëruar më herët Zaev, mandatar do të jetë pasardhësi i tij në krye të LSDM-së, Dimitar Kovaçevski.
Sipas Kushtetutës, Pendarovski është i obliguar që në afat prej 10 ditësh t’ia besojë mandatin partisë, përkatësisht partive që kanë shumicë në Kuvend. Kryeministri i mandatuar ka 20 ditë kohë për të paraqitur në Kuvend programin e punës dhe përbërjen e qeverisë.
Në fund të tetorit, në natën e zgjedhjeve të raundit të dytë të zgjedhjeve lokale, kur u bë e qartë se LSDM u mund nga partia rivale VMRO-DPMNE, Zaev publikisht shpalli dorëheqjen e tij si kryetar i partisë së tij dhe kryeministër.
Dorëheqjen si kryetar partie ai e bëri më 26 nëntor para organeve më të larta të LSDM-së.
Zaev u zgjodh kryetar i LSDM-së në vitin 2013. Qeverinë e parë e formoi më 31 maj 2017, ndërsa të dytën më 30 gusht 2020. /tesheshi.com/
