Nga Redaksia
Arra e fortë është thyer më së fundi: Vulloviqët e Zubin Potokut, pas shumë presioneve, shantazheve e kërcënimeve për likuidim, bëjnë paqe me Aleksandar Vuqiqin dhe kryekrimineline dorën e djathtë të kryeministrit serb, Zvonko Veselinoviqin.
Stevan Vulloviq, kryetar i komunës së Zubin Potokut në veri të Kosovës, nga frika dhe presioni për sigurinë e tij personale, të familjes dhe të pasurisë, është larguar nga rradhët e Partisë Socialiste e Serbisë (SPS), duke kaluar tek Partia Përparimtare Serbe (SNS), parti e Vuqiqit.
Por si erdhi puna deri këtu dhe çfarë e ka shtyrë Stefan Vulloviqin që të braktisë partinë e tij?
Ai është njëri nga themeluesit e SPS-it për Zubin Potokun dhe politikan aktiv e shumë radikal i kësaj partie që nga koha kur në krye të saj ishte Sllobodan Millosheviqi.
Një burim konfidencial nga veriu i Kosovës, i cili ndjek nga afër çdo zhvillim të atjeshëm, i tha redaksisë së portalit tesheshi.com se shkaku kryesor i marrjes së një vendimi të tillë nga Vulloviqët është presioni që është bërë mbi ta, familjen dhe biznesin e tyre muajve të fundit nga ana e kryeministrit Aleksandar Vuçiq nëpërmjet mashës së tij në Veri, kryekriminelit me nam Zvonko Veselinoviq, që tani njihet edhe si biznesmen e njeriu më i afërt me kreun e qeverisë së Beogradit.
Sipas burimit, Vulloviqi në mandatin e tij si kryetar i Zubin Potokut ka nënshkruar disa marrëveshje me qeverinë e Kosovës si dhe projekte investuese të cilat përmes kabinetit qeveritar të Prishtinës i ka financuar Bashkimi ose Komision Evropian, e për të cilat Beogradi ka qenë shumë i shqetësuar.
“Të gjitha projektet që janë dhënë, janë fituar nga kompania e kryetarit Vulloviq, Elektromont, nga Zubin Potoku, ndërkohë që Vulloviqi nuk ka kundërshtuar as financimin e disa punëtorëve të komunës së Zubin Potokut nga ana e Qeverisë së Kosovës”, ka thënë burimi.
Por të gjitha këto lëvizje, Vulloviqi i ka bërë në pavarësi të plotë nga Beogradi, gjë që e ka shqetësuar Vuqiqin. Dhe që pas këtij momenti kanë nisur presionet.
Burimi thotë se cikli i paralajmërimeve dhe kërcënimeve për të ndryshuar kurs, nisi me rastin kur automjeti tip Mercedes GL e vëllait të kryetarit, Srgjan Vulloviqit, i është vënë flaka mu në qendër të Zubin Potokut.
Dhe sipas tij, edhe pse policia nuk e ka zbardhur si rast, pas vënies së zjarrit të makinës së Vulloviqit, qëndron direkt kryekrimineli i veriut të Kosovës, Zvonko Veselinoviq, për të cilin EULEX-i ka lëshuar një flet-arrest kohë më parë për sulmet që ai ka bërë ndaj pjesëtarëve të KFOR-it dhe në djegien dhe shkatërrimin e pikës kufitare në Jarinje të Leposaviqit.
“Veselinoviq ka angazhuar njerëzit e tij në Veri që të djegin xhipin e Srgjan Vulloviqit dhe në këtë mënyrë t’i dërgojnë paralajmërim të qartë vëllezërve Vulloviq se nuk guxojnë të bëjnë me kryet e vet në marrëveshjet me Prishtinën, pa miratimin e kryeministrit Vuçiqit”, thotë burimi nga brenda komunës së Zubin Potokut.
Dhe pas këtij akti, siç sqaron burimi, kryetari i Zubin Potokut, Stevan Vulloviq shumë i shqetësuar për jetën, familjen dhe pronën e tij përrallore, për tre ditë ka qëndruar në Beograd duke nënshkruar një marrëveshje mirëkuptimi se pa lejen e qeverisë së Beogradit, asnjë punë në Zubin Potok nuk guxon të realizohet.
Po kush janë Vulloviqët?
Srgjan Vulloviq, vëllai i kryetarit të cilit iu dogj automjeti, është drejtor i hidrocentralit të Gazivodës dhe i liqenit me të njëjtin emër. Por ai njihet dhe si njeri i afërt me ministrin e Jashtëm të Kosovës, Hashim Thaçi; dhe për këtë, Beogradi ka qenë shumë i shqetësuar se mos ai nënshkruan ndonjë marrëveshje me Prishtinën duke bërë që hidrocentrali dhe liqeni të kalojnë nën kompetencat e qeverisë së Kosovës.
Vëllezërit Vulloviq konsiderohen si milionerë. Dyshohet që pasurinë ata e kanë bërë në mënyrë të jashtëligjshme, me tendera të dyshimtë që i kanë marrë përmes firmës së tyre autotransportuese Kolasin Prevoz, ndërmarrje kjo nga Mitrovica e cila është e regjistruar si në Beograd ashtu dhe në Prishtinë.
Po ashtu, Srgjan Vulloviq është pronar edhe i autoshkollës, Maraton, që funksionon në bazë të ligjeve të Serbisë.
Në anën tjetër, kryetari i Zubin Potokut, Stevan Vulloviq, ka qenë drejtor shumëvjeçar i sistemit të energjisë elektrike në veriun e Kosovës, Elektrokosmet, që në mënyrë ilegale ka furnizuar me energji elektrike këtë pjesë të Kosovës.
Po ashtu, ai është edhe pronar i kompanisë Elektromont nga Zubin Potoku, ndërmarrje kjo që vitet e fundit ka fituar të gjithë tenderat që janë dhënë në komunë, vlera e të cilëve arrin mbi 4 milion euro.
Në këtë mënyrë, vëllezërit Vulloviq kanë bërë milionat e tyre, ndërsa tani janë bërë edhe anëtarë të Partisë Përparimtare Serbe të kryeministrit Vuçiq, duke u përbetuar se do t’i realizojnë të gjitha detyrat që do t’u japë Beogradi dhe se nuk do veprojnë në kokën e tyre. Gjë kjo që sqarohet nga burimi konfidencial. /tesheshi.com/
