Nga Blendi Gashi
Kryeministri i Serbisë, Aleksandër Vuçiq, sërish ka treguar muskujt me vizitën që bëri në Kosovë, konkretisht në komunat e banuara me serbw.
Si edhe në vizitat e kaluara, ai sërish provokoi ku tha se “Trepça është e jona”, dhe bëri deklaratën tashmë të njohur se “Serbia nuk do ta njoh Kosovën”.
Këto deklarata i bëri derisa në krah të tij kishte Branimir Stojanoviqin, zëvendësin e kryeministrit të Kosovës, Isa Mustafa, si dhe dy ministrat serbë në qeverinë e Kosovës, Lubomir Mariq dhe Dalibor Jetiq.
Kështu, kryeministri serb Vuçiq edhe një herë tregoi se politikanët serbw të emëruar nga qeveria “Mustafa”, janë nën urdhërat e tij dhe punojnë për shtetin serb; e në asnjë rrethanë nuk janë nën udhërat e Isa Mustafës dhe nuk punojnë për interesat e qytetarëve të Kosovës.
Shoqërimi i Vuçiqit nga politikanët serbët që janë në qeverinë “Mustafa”, ka revoltuar edhe opozitën kosovare e cila thotë se pushteti aktual ka kaluar çdo normë të përgjegjësisë shoqërore dhe institucionale.
Ndërsa analistë në vend, thonë se qeveria duhet të shkarkojw ministrat serbq që shoqëruan Vuçiqin, dhe duhet të mos lejojë më hyrjen e zyrtarëve të Serbisë në Kosovë.
Haxhiu: Sjellja arrogante e kryeministrit Mustafa ka kaluar çdo normë të përgjegjësisë
Deputetja e AAK-së, Teuta Haxhiu, thotë se vizita e kryeministrit serb në vendin tonë, për të cilën thotë se nuk do ta njoh kurrë, është krejt e papranueshme, madje edhe e pashpjegueshme.
Sipas Haxhiut, akoma më i pashpjegueshëm bëhet fakti që ky njeri vjen në Kosovë dhe bën deklarata të tilla skandaloze i shoqëruar nga ministra të kabinetit të Isa Mustafës, pra qeverisë së Kosovës.
“Mendoj se nuk ka absurd më të madh se sa kjo që po ndodh sot në Kosovë, në Kosovën e martirizuar e cila deri në vitin jo shumë të largët në vitin 1999, ishte pre e pushtuesëve serb të cilët sot i përfaqëson një kryeministër i tipit Vuqiq. Pra siç e thashë edhe më lartë, shoqërimi që sot po i bëjnë ministrat e qeverisë së Isa Mustafës dhe heshtja e sjellja arrogante e kryeministrit Mustafa ka kaluar çdo normë të përgjegjësisë shoqërore dhe institucionale”, thotë deputetja Haxhiu, për tesheshi.com.
Deputeti i NISMA-s për Kosovën, Zafir Berisha, përmes një postimi bërë në Facebook, thotë qeveria e Kosovës po tregon se është një filial i qeverisë së Serbisë; dhe sipas tij këtë e dëshmon shoqërimi i disa ministrave të Isës ndaj Vuçiqit.
“Qeveria esadiste aktuale vazhdon të jetë turpi i Kosovës, nuk po i kuptoj nëse i dinë ata përgjegjësitë e tyre ndaj shtetit”, ka thënë Berisha.
Krasniqi: Qeveria të shkarkojë ministrat serb që shoqëruan Vuçiqin
Analisti politik, Faik Krasniqi, thekson se ministrat serb në qeverinë e Kosovës, të cilët gjithmonë janë nën shoqërimin e çdo zyrtari të lartë të qeverisë serbe, sa herë ata vizitojnë vendin tonë, do të duhej automatikisht të shkarkoheshin nga qeveri.
“Ky tolerim ndaj tyre ka bërë që ata mos ta përfillin shtetin e Kosovës, dhe të punojnë sipas direktivave të Beogradit. E në rastin e Vuçiqit, qeveria e Kosovës duhet që me palën serbe të sillet në mënyrë reciproke. Deri sa shteti serb nuk lejon asnjë zyrtar të Kosovës, që të shkojë në vizitë zyrtare atje, e sidomos në Kosovën Lindore që popullohet me shumicë nga shqiptarët, atëherë edhe shteti i Kosovës duhet të sillet në atë mënyrë”, ka thënë Krasniqi, për tesheshi.com.
Krasniqi më tej thotë se zyrtarët serbë nuk kanë pse të vijnë në Kosovë, deri sa zyrtarët tanë ndalohen nga autoritetet serbe.
“Ky tolerim ndaj zyrtarëve serb, Kosovën e vë në siklet dhe me të drejtë shtrohet pyetja: jemi apo s’jemi shtet. Ky tolerim ndaj politikës shoviniste dhe nacionaliste serbe, në raport me Kosovën dhe shqiptarët, duhet të marrë fund njëherë e përgjithmonë. Përndryshe, s’ka pse të themi jemi shtet i pavarur dhe sovran”, thotë Krasniqi.
Ndryshe, ndaj deklaratave të bëra sot nga Vuçiq në Kosovë se “Trepça është e jona”, ka bërë që të reagojnë edhe qytetarë të vendit, të cilët i kanë shprehur brengën e tyre kryeministrit Isa Mustafa përmes rrjetit social Facebook.
Por, kryeministri Isa Mustafa, i është përgjigjur qytetarit Bujar Beqiri, duke i bërë atij apel që të mos shqetësohet për ato çfarë thotë Vuçiqi. “Bujar, mos u brengos, ne jemi të zotët e shtëpisë. Të zotët e Kosovës dhe Trepçës”, i është përgjigjur Mustafa në Facebook, qytetarit në fjalë. /tesheshi.com/
