Vendimi i BE-së për ta mbajtur derën të mbyllur për Maqedoninë e Veriut dhe Shqipërinë ka bërë që rajoni të kuptojë se nuk mund të mbështetet vetëm te fqinjët perëndimorë, tha Presidenti serb Aleksandar Vuçiç në një intervistë për Financial Times.
“Ne duhet të kujdesemi për veten. Kjo është mënyra e vetme. Çdo veprim tjetër do të ishte shumë i papërgjegjshëm “, tha Vuçiç.
Ai deklaroi se vendimi i BE-së, marrë edhe përkundër përpjekjeve për reforma nga Shqipëria dhe Maqedonia e Veriut, e kishte bërë të qartë se “nuk varet gjithçka nga ne,” duke shtuar se refuzimi i BE-së për të hapur bisedime të pranimit me dy vende të Ballkanit justifikon politikën e tij të raporteve të ngushta me Kinën dhe Rusinë.
Dhe për koincidencë, Beogradi është gati të nënshkruajë marrëveshjen e tregtisë së lirë me Bashkimin Euro-azian të premten.
“Ne nuk mund të varemi nga vendimi i radhës i Këshillit Evropian, as nga qeveria Holandeze e as ajo Daneze”, tha Vuçiç.
Kujtojmë se Serbia, ashtu si Kosova, kanë ende parakushte për të nisur hapjen e negociatave, dhe rinisja e dialogut është njëra nga ato. /tesheshi.com/
